काेकळे-करलहट्टी रस्त्याची वाताहात

कवठेमंहाकाळ : कवठेमहांकाळ तालुक्यात कोकळे ते करलहट्टीजाणारा रस्ता वाहतुकीसाठी पूर्णपणे निकामी झाला आहे. रस्त्यात खड्डे की, खड्ड्यात रस्ता अशी अवस्था आहे. या मार्गावर अपघातांचे प्रमाण वाढत आहे. त्यामुळे त्वरित या रस्त्याचे डांबरीकरण करावे, अशी मागणी ग्रामस्थांमधून हाेत आहे.

कोकळे ते करलहट्टी रस्ता पुढे कर्नाटक हद्दीला जोडला जाताे. या रस्त्यावर ठिकठिकाणी खड्डे निर्माण झाल्याने वाहनचालकांची गैरसोय होत आहे. दुरवस्था झालेल्या या रस्त्यावर अनेकदा छोटे-मोठे अपघात होत असल्याने प्रवासी संतप्त आहेत. करलहट्टीतील लोकांना तालुक्याच्या ठिकाणी जाण्यासाठी करलहट्टी ते कोकळे हा रस्ता सोयीचा मानला जातो. गावांमध्ये दवाखाना व माध्यमिक विद्यालय, बँक व इतर सुविधा नसल्याने ज्येष्ठ नागरिक, शेतकरी, महिला, प्रवासी व विद्यार्थी या रस्त्याने नेहमी ये-जा करीत असतात. रस्त्याच्या दुरवस्थेमुळे करलहट्टी व वाडी वस्तीवरील नागरिकांना येथून प्रवास करताना तारेवरची कसरत करावी लागते. रस्ता अत्यंत खराब असल्याने वेळेत पोहोचता येत नाही. अनेकदा वेळेवर उपचार न मिळाल्याने रुग्णांच्या जिवाला धोका निर्माण होतो. करलहट्टी गावाकडे येण्यासाठी पर्यायी रस्ता नसल्याने हा रस्ता येथील नागरिकांना दळणवळणाच्या दृष्टीने गरजेचा आहे. या रस्त्याला अनेक दिवसांपासून खड्ड्याचे ग्रहण लागल्याने प्रवासात संताप व्यक्त होत आहे. पावसाळा सुरू होण्यापूर्वी या रस्त्याचे काम मार्गी लावावे, अशी मागणी परिसरातील नागरिकांकडून होत आहे.

गावामध्ये येणारी बसही खराब रस्त्यामूळे बंद करण्यात आली आहे. तरी लोकप्रतिनिधी व बांधकाम विभागाने या रस्त्याची तत्काळ दुरुस्ती करावी, अशी मागणी या भागातील प्रवासी व नागरिकांमधून हाेत आहे.

चौकट

आंदाेलनाचा इशारा

कवठेमहांकाळ तालुक्यातील कोकळे ते करलहट्टीकडे जाणारा रस्ता खड्ड्यांनी व्यापला आहे. लहान-मोठे अपघात सातत्याने घडत आहेत. त्यामुळे तत्काळ हा रस्ता दुरुस्ती करण्यात यावा, अन्यथा करलहट्टी ग्रामस्थांच्या वतीने तीव्र आंदोलन करू, असा इशारा ग्रामपंचायत सदस्य सखाराम ओलेकर, दत्तात्रय ओलेकर, आकाराम आटपाडकर, सागर बेडगे, शिवाजी इरकर, विठ्ठल पांढरे, संतोष ओलेकर, संभाजी बेडगे मेजर श्रीरंग ओलेकर, कोंडीबा इरकर यांनी दिला आहे.