वाळवा-शिराळ्यात पुन्हा संस्थात्मक बांधणी

लोकमत न्यूज नेटवर्क

इस्लामपूर : इस्लामपूर आणि शिराळा मतदारसंघात राष्ट्रवादीच्या नेत्यांनी आपल्या सहकारी संस्था सक्षमपणे चालविल्या आहेत. मात्र विरोधी गटातील अवस्था उलटी आहे. त्यामुळे आगामी काळात पुन्हा सहकारी चळवळीला ताकद देऊन सर्व क्षेत्रातील संस्था उभ्या करण्यासाठी नेते धडपडत आहेत.

वाळवा, शिराळ्यात जलसंपदा मंत्री जयंत पाटील यांच्या नेतृत्वाखाली तीन सहकारी साखर कारखाने आहेत. त्यांची ताकद मोठी आहे. शैक्षणिक संस्थांचे जाळे, राजारामबापू दूध संघ, बँक, सूतगिरणी आदी संस्थात्मक ताकद. याउलट त्यांच्याविरोधात असलेल्या राहुल महाडिक, सम्राट महाडिक आणि नगराध्यक्ष निशिकांत पाटील यांच्याकडे शैक्षणिक संस्था आहेत. महाडिक बंधू सहकारी तत्त्वावर दूध व्यवसायाकडे झुकले आहेत; तर माजी कृषी राज्यमंत्री सदाभाऊ खोत हे शैक्षणिक संकुलन उभे करत आहेत. इस्लामपूूर मतदारसंघात शहरीपासून ते ग्रामीणपर्यंत राष्ट्रवादीच्या माध्यमातून सहकारी संस्थांचे जाळे भक्कम आहे. हीच ताकद जयंत पाटील यांच्या पाठीशी आहे. त्यामुळे त्यांचे राजकीय बलस्थान आहे.

शिराळा मतदारसंघात आमदार मानसिंगराव नाईक यांचे नेतृत्व आणि संस्थात्मक ताकद मोठी आहे. त्यांच्या विरोधात नेहमीच असलेले माजी आमदार शिवाजीराव नाईक यांनी स्थापन केलेल्या संस्था पुन्हा भक्कम करण्यासाठी हालचाली सुरू केल्या आहेत. यामध्ये प्रामुख्याने शिवाजी केन प्रोसेस, यशवंत ग्लुकोज आदी संस्थांचा समावेश आहे, तर डोंगरी भागाचे नेतृत्व करणारे माजी मंत्री शिवाजीराव देशमुख यांनी काँग्रेसच्या ताकदीवर करुंगली (कोकरूड) येथे निनाई सहकारी साखर कारखान्याची उभारणी केली. सध्या हा कारखाना दालमिया भारत शुगर यांच्याकडे आहे. त्यामुळे सहकारी चळवळीतील देशमुख गटाची ताकद कमी झाली. परंतु शैक्षणिक क्षेत्रात मात्र त्यांचे योगदान आजही टिकून आहे. सत्यजित देशमुख आगामी काळात ५ ते ६ कोटींचा नवीन प्रकल्प उभा करण्याच्या तयारीत आहेत. एकंदरीत राष्ट्रवादीच्या विरोधातील नेते सहकारी संस्थांची पुन्हा बांधणी करून स्वत:ची राजकीय ताकत वाढवित आहेत.

फोटो- ०२०२२०२०१-आयएसएलएम-इस्लामपूर न्यूज

शिवाजीराव नाईक, सदाभाऊ खोत, सत्यजित देशमुख, राहुल महाडिक, सम्राट महाडिक.