लोकमत न्यूज नेटवर्क
सांगली : महागाईने उच्चांक गाठलेला असताना गॅस दरवाढीने त्यात नवी भर टाकली आहे. १ जुलैपासून घरगुती गॅस सिलिंडर २५.५० रुपयांनी महागला. महिन्याच्या प्रत्येक १ तारखेला गॅस कंपन्या किमतीचा आढावा घेऊन दर कमी - जास्त करतात. त्यानुसार ही दरवाढ झाली आहे.
आतापर्यंत ८०८ रुपयांना मिळणाऱ्या सिलिंडरसाठी आता ८३४ रुपये मोजावे लागणार आहेत. सामान्य गृहिणीचे महिन्याचे बजेट विस्कळीत करणारी ही दरवाढ आहे. गेल्या दीड वर्षांपासून लॉकडाऊनमुळे उत्पन्न कमी झाले आहे, याउलट महागाई मात्र थांबण्याचे नाव घेईना झाली आहे. विशेषत: इंधनाची दरवाढ मोठी डोकेदुखी ठरली आहे. पेट्रोल शंभरी पार गेली असून, डिझेल शंभरी गाठू लागले आहे. महागाईचा आगडोंब उसळला असताना गॅस दरवाढीने त्यात तेल ओतले आहे. हातावरचे पोट असणाऱ्यांसाठी गॅसचा वापर म्हणजे चैन ठरू पाहात आहे.
बॉक्स
गावाकडे पुन्हा चुलींचा धूर
- गॅसची सततची दरवाढ महिलांना पुन्हा चुलीच्या धुराकडे वळवणारी ठरत आहे. गावाकडे लाकूडफाटा सहज उपलब्ध होत असल्याने सिलिंडरचा वापर कमी होऊ पाहात आहे.
- चहा, दूध तापवण्यासारख्या हलक्या कामांसाठीच गॅसचा वापर करण्यासाठी महिलांचे प्राधान्य आहे. सकाळ - संध्याकाळचा स्वयंपाक, आंघोळीचे पाणी यासाठी चुली पुन्हा धगधगू लागल्या आहेत.
- शहरी झोपडपट्ट्यांमध्ये उज्ज्वला योजनेतून गरीब महिलांना मोफत गॅस जोडण्या देण्यात आल्या होत्या. आता सिलिंडर परवडत नसल्याने त्यांनी पुन्हा चुली मांडल्या आहेत.
- सकाळी एकदाच पूर्ण स्वयंपाक करते. संध्याकाळी तोच गरम करून जेवणावळी उरकते. त्यातून गॅसची बचत करण्याचा प्रयत्न असल्याचे गृहिणींनी सांगितले.
बॉक्स
फेब्रुवारी महिन्यात ५३ रुपयांची वाढ
फेब्रुवारी महिन्यातही घरगुती गॅस सिलिंडर ५३ रुपयांनी महागला होता. त्यावेळी लॉकडाऊन शिथिल असल्याने महागाईचा झटका तीव्रतेने जाणवला नाही. जुलैमध्ये सर्वत्र लॉकडाऊन असल्याने उद्योग-व्यवसाय बंद आहेत. या काळात ही दरवाढ तीव्रतेने जाणवणारी ठरली आहे.
ग्राफ
ऑगस्ट २०२० ते डिसेंबर २०२० मध्ये झालेली दरवाढ
ऑगस्ट घरगुती ६११, व्यावसायिक १,१६९
सप्टेंबर घरगुती ६११, व्यावसायिक १,१६९
ऑक्टोबर घरगुती ६११ , व्यावसायिक १,१९३
नोव्हेंबर घरगुती ६११, व्यावसायिक १,२३०
डिसेंबर घरगुती ६८३, व्यावसायिक १,३३२
ग्राफ
जानेवारी २०२१ ते जुलैमध्ये झालेली दरवाढ
जानेवारी घरगुती ७१०, व्यावसायिक १,४५०
फेब्रुवारी घरगुती ७६३, व्यावसायिक १,५७२
मार्च घरगुती ८१०, व्यावसायिक १,६७४
एप्रिल घरगुती ७९५, व्यावसायिक १,७०३
मे घरगुती ७९५ , व्यावसायिक १७०२
जून घरगुती ८०५, व्यावसायिक १७५०
जुलै घरगुती ८३४, व्यावसायिक १६१४
कोट
महागाईने भंडावून सोडले
प्रत्येक महिन्यात १०-२० रुपयांनी गॅसची दवाढ सुरू आहे. शहरी भागात चुलीसारखा पर्यायदेखील नाही. गॅसची बचत पूर्वीपासूनच करत आहोत. दरवाढ स्वीकारण्याशिवाय पर्याय नाही हे कळून चुकले आहे.
- रोहिणी कोरे, गृहिणी, सांगलीवाडी
सरकारने लॉकडाऊनमध्ये दिलासा देण्याऐवजी गॅस दरवाढ करून महागाईच्या वरवंट्याखाली लोटले आहे. कोरोनामुळे पतीचे उत्पन्न कमी झाले आहे, अन्य खर्च मात्र वाढतच आहेत. खर्च कमी करायचे तरी कशाचे? हेच कळेना झाले आहे.
- जुई घार्गे, गृहिणी, मिरज