नव्या वर्षातही जीएसटी वसुलीत वाढ

सांगली : जीएसटी वाढीचा आलेख नव्या वर्षातही कायम राहिला असून गतवर्षाच्या तुलनेत यंदा जानेवारीतील महसुलात १ टक्क्याने अधिक वाढ झाली आहे. कोरोनामुळे निर्माण झालेली तूट चालू आर्थिक वर्षात भरून निघण्याची शक्यता आहे.

जून २०२० पासून सुरू झालेला जीएसटी वाढीचा ट्रेंड ऑक्टोंबर २०२० पर्यंत सलग चौथ्या महिन्यातसुद्धा कायम होता. मात्र, नोव्हेंबरमध्ये किंचित घसरण झाली होती. पुन्हा डिसेंबर आणि जानेवारी २०२१ मध्ये जीएसटी वसुलीत वाढ झाली आहे. सांगली जिल्ह्याच्या जीएसटी संकलनात जानेवारी २१ मध्ये १ टक्के वाढ दिसून येत आहे. ऑक्टोबरचा अपवादवगळता मागील वर्षीच्या तुलनेत जीएसटी संकलन वाढत आहे

मागील वर्षी जानेवारीत जीएसटीचे संकलन रु ६९.३५ कोटी इतके होते. जानेवारी २०२१ मध्ये ७० कोटी ४ लाख इतके संकलन झाले आहे. महसुलात सुमारे ६९ लाखांची वाढ झाली आहे.

एप्रिल २०२० ते जानेवारी २०२१ या पहिल्या १० महिन्यांचा विचार करता जीएसटीचा महसूल हा मागील वर्षीपेक्षा अद्याप ६६ कोटी ४० लाखाने कमी आहे. जिल्ह्यात एप्रिल २०१९ ते जानेवारी २०२० या कालखंडात ६९३.९१ कोटी इतका महसूल जमा झाला होता तर आता एप्रिल ते जानेवारी २०२१ या कालखंडात ६२७.५० कोटी महसूल जमा झाला आहे म्हणजेच चालू आर्थिक वर्षात १० महिन्यात ९.५० टक्के कमी महसूल जमा आहे.

सांगली जिल्ह्यात २५ हजार जीएसटी करदाते आहेत. त्यापैकी राज्य शासनाकडे १६ हजार तर केंद्र शासनाकडे ९ हजार करदाते आहेत. जिल्ह्यात साखर उद्योगाकडून मोठ्या प्रमाणात महसूल येत आहे. बोगस बिल प्रकरणे, लेखापरीक्षण, १०० कोटींवर इ-इन्व्हॉइस आदी उपाययोजना सुरू झाल्या आहेत

विवरणपत्रात भरलेली माहिती इतर ऑनलाईन माहितीशी पडताळून करभरणा करून घेतला जात आहे. हा ट्रेंड जर असाच सुरू राहिला तर कोरोनामुळे होत असलेले नुकसान भरून निघण्याची शक्यता आहे.