कुपवाड तलाठी कार्यालयात शेकडो नोंदी रखडल्या

कुपवाड : शहरातील तलाठी कार्यालयामध्ये तलाठ्याकडून गोरगरीब नागरिकांच्या गेल्या वर्षभरापासूनच्या नोंदी रखडल्या आहेत. या कार्यालयात तलाठ्याकडून आधी मेवा आणि मग सेवा हे धोरण अवलंबिले जात असल्याने धनदांडग्यांच्या आणि दलालांच्या नोंदी मात्र त्वरित होत आहेत, असा आरोप नागरिकांमधून होत आहे. गोरगरीब नागरिकांना मात्र कायम हेलपाटे मारावे लागत आहेत. या प्रकरणात जिल्हाधिकाऱ्यांनी लक्ष घालून दोषी तलाठ्यावर कारवाई करावी, अशी मागणी होऊ लागली आहे.

कुपवाड शहराच्या मध्यवर्ती ठिकाणी तलाठी कार्यालय आहे. भ्रष्टाचारामुळे या चावडीतील तीन ते चार तलाठ्यावर कारवाई झाली आहे. मागील वर्षी एका तलाठ्यावर पोलीस ठाण्यात कारवाई झाली. त्याच्यावर महसूल विभागाकडून कोणती कारवाई केली गेली हा प्रश्न अजूनही गुलदस्त्यातच आहे. त्याच्या जागी नवीन तलाठ्याची नेमणूक झाल्यावर चित्र पालटेल, असे गोरगरीब शहरवासीयांना वाटत होते. मात्र परिस्थिती पूर्वी होती तशीच अनुभवायला मिळत आहे. या कार्यालयात नागरिकांच्या गेल्या वर्षेभरापासूनच्या नोंदी रखडल्या आहेत. या कार्यालयात तलाठ्याकडून आधी मेवा मग सेवा हे धोरण अवलंबिले जात असल्याचा नागरिकांचा आरोप आहे. मेवा मिळालेल्यांच्या व दलालांच्या त्वरित नोंदी होत असल्याची चर्चा आहे. गोरगरिबांना कायम हेलपाटे मारावे लागत आहेत. तलाठी कार्यालयात गोरगरीब नागरिकांच्या नोदी होणार की नाही असा प्रश्न सर्वाना पडू लागला आहे. या प्रकरणात जिल्हाधिकारी यांनी लक्ष घालून दोषींवर त्वरित कारवाई करावी, अशी मागणी नागरिकांतून होत आहे.

चौकट

ऑनलाइन चुकीची शिक्षा नागरिकांना

कुपवाडमधील एका नागरिकाने एक वर्ष झाले नोंदी घालण्यासाठी अर्ज केला होता. त्यामध्ये तलाठी कार्यालयाकडून ऑनलाइनमध्ये चूक झाली आहे. मात्र वर्षे होऊनही कार्यालयाकडून झालेल्या चुकीमुळे त्या नागरिकाला तलाठी कार्यालयाचे उंबरे झिजवावे लागत आहेत. तलाठी बदलले मात्र अजूनही संबंधित नागरिकांचे काम झाले नाही. नोंद घालताना चुकी तलाठ्याची होऊनही त्याची शिक्षा नागरिकांना भोगावी लागत आहे.

चौकट

तलाठी कार्यालयात दलालांचा सुळसुळाट...

कुपवाड तलाठी कार्यालयात दलालांचा सुळसुळाट झाला आहे. विश्रामबागमधील वृध्द नागरिकांचे तर अतोनात हाल होत आहेत. गैरकारभारास जबाबदार धरून दोषी तलाठ्यावर त्वरित कारवाई करावी. गोरगरीब नागरिकांना न्याय मिळावा, अशी मागणी नगरसेवक विनायक सिंहासने यांनी केली आहे.