इंधन दरवाढीचे भूत ग्राहकांच्या मानगुटीवर

सांगली : पेट्रोल, डिझेलच्या दरात झालेली वाढ ग्राहकांची अडचण वाढविणारी ठरत आहे. बाजारपेठेला लागलेली उन्हाळ्याची चाहूल आणि या दरवाढीमुळे भाजीपाल्यासह सर्वच जीवनावश्यक वस्तूंच्या दरात वाढ होत आहे. गेल्या दीड महिन्यांपासून स्थिर असलेले धान्य, कडधान्यांच्या दरातही वाढ झालेली आहे.

या सप्ताहात भाजीपाल्याच्या दरात सरासरी १० रुपयांनी वाढ झाली, तर कांदा, बटाटा, लसणाचे वाढलेले दर कायम आहेत. कांदा दरात अजून वाढ होण्याची शक्यता व्यापाऱ्यांनी व्यक्त केली. दरम्यान, या आठवड्यात फळ मार्केटमध्ये चिकूची चांगली आवक होते आहे. तर संत्र्यांची आवक थोडी कमी होत आहे. कलिंगड आणि चिकूची आवक अशीच वाढत राहण्याचा अंदाज आहे.

किराणा मालाच्या दरात कधी नव्हे ती स्थिरता आली होती. त्यातही आता वाढ होत आहे. खाद्यतेलाचे दर स्थिर असले तरी किराणाचे इतर जिन्नस महागले आहेत.

चौकट

चिकूची आवक वाढतेय

फळ बाजारात उन्हाळ्याची चाहूल लागल्याचे चित्र आहे. कलिंगडसह या आठवड्यापासून चिकूचीही आवक वाढत आहे. सध्या स्थानिक शेतकऱ्यांसह बाहेरील चिकूची आवक वाढत असली तरी दरही प्रतिकिलो ३० ते ५० रुपयांपर्यंत स्थिर आहेत.

चौकट

मसाल्याच्या पदार्थांचे दर वाढले

किराणा बाजारपेठेत या आठवड्यात दरातील चढ-उतार कायम आहे. त्यातही मसाल्याच्या पदार्थांचे दर मात्र २० रुपयांनी वाढले आहेत. अशीच वाढ कायम राहण्याची शक्यता आहे.

चौकट

गवारी, भेंडी दराचा तोरा

भाजीपाला दरातील वाढ कायम राहताना, करडईसारख्या पालेभाज्यांची आवक घटली आहे; तर फळभाज्यांच्या दरात सरासरी १५ रुपयांनी वाढ झाली आहे. ढबू मिरचीच्या दरात वाढ होत ४० ते ५० रुपये प्रतिकिलोने ती मिळत आहे.

कोट

दरातील वाढ आणि ग्राहकांचा प्रतिसाद दोन्हीही कायम आहे. सध्या काहीप्रमाणात लग्नासह सार्वजनिक कार्यक्रम सुरू असल्याने खरेदी समाधानकारक आहे.

अजित पाटील, किराणा दुकानदार

कोट

जिथे जाईल तिथे दरवाढ, मध्यमवर्गीयांनी करायचे काय. शासनाकडून किमान ज्याच्या दरावर नियंत्रण ठेवता येते, त्यावर तरी नियंत्रण ठेवून दिलासा द्यावा.

कमल भोसले, गृहिणी

कोट

या आठवड्यात जिल्ह्यासह कर्नाटकातूनही चिकूची आवक वाढत आहे. ग्राहकही त्यास प्रतिसाद देत आहेत. यापुढे महिनाभर अशीच आवक राहणार आहे.

बाळासाहेब चव्हाण, व्यापारी