प्रेमप्रकरणातून युवकाच्या खूनप्रकरणी चौघांना न्यायालयीन कोठडी

शिराळा : प्रेमप्रकरणातून मारहाण केलेल्या सातवे (ता. पन्हाळा) येथील शिवतेज विनायक घाटगे या युवकाच्या मृत्यूप्रकरणी भाऊसाहेब बाजीराव दळवी, पतंग विकासराव दळवी, सौरभ भाऊसाहेब दळवी, अजय विजय दळवी या चौघांना शिराळा येथील प्रथम वर्ग न्यायाधीश एच. एस. सातपुते यांनी न्यायालयीन कोठडीचा आदेश दिला आहे. याबाबत दीपक यशवंत हांडे (वय ४८, रा. सातवे, ता. पन्हाळा) यांनी शिराळा पोलिसांत फिर्याद दिली होती. ही घटना बुधवार, दि. ८ रोजी सायंकाळी पावणेसहा वाजता घडली होती.

दीपक हांडे हे त्यांची फकिरवाडी येथे विकलेली म्हैस सोडण्यासाठी शिवतेजसोबत त्याच्या चुलत्यांचा टेम्पो घेऊन जात होते. दरम्यान, सहा महिन्यांपूर्वी मुलगी पळवून नेल्याचा राग मनात धरून मांगले-कांदे रस्त्यावर सावर्डे फाटा येथे भाऊसाहेब दळवी, पतंग दळवी, सौरभ दळवी, अजय दळवी यांनी शिवतेजला मारहाण केली. त्यास मोटरसायकलवरून अन्यत्र नेऊन विवस्र करीत जबर मारहाण केली. त्यात तो गंभीर जखमी झाला.

कोडोली पोलिसांनी त्याला प्रथम उपचारासाठी दाखल करण्यास सांगितले. त्यानंतर नातेवाईकांनी त्याला एका खासगी रुग्णालयात दाखल केले. त्या वेळी त्याची प्रकृती चांगली होती. मध्यरात्री त्याची प्रकृती अधिकच खालावली. पुढील उपचारासाठी त्याला काेल्हापुरात सीपीआर रुग्णालयात दाखल करण्यात आले. पण उपचारापूर्वीच त्याचा मृत्यू झाला. याप्रकरणी वरील चाैघांना अटक करण्यात आली हाेती. शुक्रवारी शिराळा न्यायालयाने त्यांची न्यायालयीन काेठडीत रवानगी केली.