Sangli: मिरजेत भरदिवसा गोळीबार, हल्लेखोराची गोळी चुकवल्याने एकजण बचावला

पूर्ववैमनस्यातून दोन गटात हाणामारी: दोघे ताब्यात

मिरज : मिरजेत मंगळवार पेठेत चर्चजवळ पूर्ववैमनस्यातून दोन गटात हाणामारी व गावठी पिस्तुलातून भरदिवसा गोळीबार करून सलून दुकानाची मोडतोड केल्याची घटना बुधवारी घडली. या प्रकरणी पोलिसांनी गुन्हा दाखल करून दोघांना ताब्यात घेतले आहे.मिरजेतील वडर गल्लीत तरुणांच्या जुन्या वादातून ही घटना घडली. बुधवारी दुपारी दीड वाजता चर्चजवळ वैभव यादव याच्या सलून दुकानात रोहन कलकुटगी (रा. वडर गल्ली, मिरज) व विकी कलगुटगी हे दोघे बसले होते. यावेळी गणेश कलगुटगी व त्याचे पाच सहा साथीदार तेथे आले. गणेश व त्याच्या साथीदारांनी रोहन यास शिवीगाळ करीत काठ्याने हल्ला चढवला. यावेळी गणेश कलगुटगी याने गावठी पिस्तुलातून रोहन याच्यावर गोळी झाडली. मात्र, रोहन याने गोळी चुकवल्याने तो बचावला. ही गोळी रस्त्यावर आदळली. यावेळी हल्लेखोरांनी वैभव यादव यांच्या सलून दुकानातील सर्व साहित्याची मोडतोड करीत नुकसान केले. रोहन व विकी यांनी हल्लेखोरांना प्रतिकार केल्याने सर्वांनी तेथून पलायन केले. गोळीबाराच्या आवाजामुळे रस्त्यावर मोठी गर्दी जमली. या घटनेमुळे मंगळवार पेठ परिसरात दहशत निर्माण झाली होते. याबाबत माहिती मिळताच पोलिस उपअधीक्षक प्रणील गिलडा, स्थानिक गुन्हे अन्वेषण विभागाचे निरीक्षक सतीश शिंदे, मिरज शहर निरीक्षक किरण रासकर घटनास्थळी दाखल झाले. या घटनेची माहिती समजताच जिल्हा पोलिसप्रमुख संदीप घुगे यांनी घटनास्थळी भेट देऊन पाहणी केली. झाडलेल्या गोळीचे रस्त्यावर पडलेले रिकामे काडतूस पोलिसांनी जप्त केले. याबाबत शहर पोलिसात रोहन संजय कलगुटगी याने गणेश तानाजी कलगुटगी, चेतन सुरेश कलगुटगी, सुरज कोरे व त्यांचे चार अन्य साथीदार अशा सात जणांविरुद्ध गोळीबार व मारहाणीची फिर्याद दिली आहे. या प्रकरणी गणेश व त्याच्या साथीदारांविरुद्ध गुन्हा दाखल केला आहे. गोळीबार प्रकरणी पोलिसांनी दोघांना ताब्यात घेतले आहे. फरारी गणेश याचा शोध सुरू असल्याचे पोलिसांनी सांगितले.संशयितांवर यापूर्वी गंभीर गुन्हे दाखलगणेश कलगुटगी हा गुन्हेगारी प्रवृत्तीचा असून, काही महिन्यांपूर्वी गणेश याच्याकडून पोलिसांनी एक गावठी पिस्तूल जप्त केले होते. याची माहिती रोहन याने पोलिसांना दिल्याचा संशय गणेश यास होता. रोहन हा एका तडीपार गुन्हेगारासोबत फिरत होता. या रागातून गणेश याने रोहन याच्यावर हल्ला चढवल्याची रोहन याची तक्रार आहे. गणेश कलकुटगी व सूरज कोरे यांच्याविरुद्ध यापूर्वी गंभीर गुन्हे दाखल आहेत.