पोट भरण्याची मारामार, मी टॅक्स कशाला भरू?

लोकमत न्यूज नेटवर्क

सांगली : जिल्ह्यात आयकर भरण्याची संख्या वाढली आहे. पण, त्याचवेळी समाजातील असे अनेक घटक आहेत, ज्यांचा आयकराशी कधी संबंधच आलेला नाही. दोनवेळच्या भाकरीसाठी त्यांचा दररोज संघर्ष सुरू असतो. हा घटक कशाला टॅक्स भरेल? टॅक्स भरण्याइतकी आमची परिस्थिती कधी सुधारणार, असा सवालही ते करतात.

समाजातील रिक्षाचालक, भाजीविक्रेता, सुरक्षारक्षक, मोलमजुरी करणाऱ्या महिला, सलूनचालक अशा अनेक घटकांची आर्थिक स्थिती जेमतेमच आहे. दररोज काम केल्यानंतर सायंकाळी त्यांच्या घरी चुली पेटतात. त्यांचा आयकर भरण्याशी कधी संबंधच आलेला नाही. किंबहुना आयकर काय असतो, हेही अनेकांना माहीत नाही. महापालिकेच्या कराच्या पावत्यांशीच त्याचा काय तो संबंध. जीवन जगण्याचा हा संघर्ष कधी मिटणार, याची चिंताही त्यांच्या चेहऱ्यावर असते. इथे पोट भरण्याची मारामारी असताना आणखी टॅक्स कुठला भरू, असा सवालही ते करतात.

चौकट

आपण भरता का टॅक्स?

कामगार : दररोजच्या हजेरीवर काम करणारा कामगार वर्ग जिल्ह्यात मोठ्या संख्येने आहे. त्याची हजेरीही अगदी कमी असते.

ऑटो चालक : दिवसाकाठी कसेबसे २०० ते ३०० रुपये मिळतात. त्यामुळे अनेक चालक टॅक्स भरत नाहीत.

भाजीपाला विक्रेता : बाजारात दिवसभर भाजी विकल्यावर मिळणाऱ्या पैशातून प्रपंच चालविणारा विक्रेताही टॅक्स भरत नाही.

फेरीवाला : रस्त्यावरील फेरीवाला, हातगाडीवालाही टॅक्स भरत नाही.

सिक्युरिटी गार्ड : सुरक्षारक्षक म्हणून काम करणाऱ्या व्यक्तीला महिन्याला सात ते दहा हजार पगार मिळतो, तोही टॅक्स भरत नाही

साफसफाई कामगार : मानधनावरील सफाई कामगारांचा पगार पंधरा हजाराच्या आसपास आहे. त्याचाही टॅक्सशी संबंध येत नाही

सलूनचालक : सलूनचा व्यवसायही तितका मोठा नाही. दिवसाकाठी ५०० रुपयांची कमाई होते असते.

लाॅन्ड्री चालक : लाॅन्ड्रीचालकांचे हातवरचे पोट आहे. साध्या खोक्यातील हा व्यवसायिकही टॅक्सपासून अलिप्त आहे.

घरकाम करणाऱ्या महिला : चार घरांची धुणीभांडी केल्यावर या महिलांच्या हाती महिन्याला तीन ते चार हजार मिळतात. ते कुठून टॅक्स भरणार?

चौकट

प्रत्येक जण टॅक्स भरतो

कल्याणकारी योजनांवर खर्चासाठी सरकारलाही उत्पनाचे मार्ग शोधावे लागतात. तसे समाजातील सर्वच घटक कोणत्या ना कोणत्या मार्गाने कर देत असतात. प्रत्यक्ष प्राप्तिकर भरून मदत करतात. तर ज्यांचे उत्पन्न कमी आहे, तेही पेट्रोल, डिझेल, जीएसटीमधून सरकारकडे कर जमा करीत असतात. - प्रा. संजय ठिगळे, अर्थशास्त्राचे अभ्यासक.