कसबे डिग्रज येथील आरोग्य शिबिरात १५० रुग्णांची तपासणी

कसबे डिग्रज : कोरोनाने माणसांना दूर केले आहे. अशा काळात आरोग्य महत्त्वाचे आहे. लाेकांची गरज ओळखून कसबे डिग्रज (ता. मिरज) येथे आरोग्य शिबिर घेऊन समाजात चांगले काम केले आहे, हा स्तुत्य उपक्रम आहे, असे प्रतिपादन मानवाधिकार संघटनेचे अध्यक्ष आनंदराव नाईक यांनी केले.

कसबे डिग्रज (ता. मिरज) येथे अण्णासाहेब डांगे वैद्यकीय महाविद्यालय आणि मानवाधिकार संघटना यांनी आयोजित केलेल्या आरोग्य शिबिरास मोठा प्रतिसाद मिळाला. रक्त, दमा, पोटविकार, हाडांचे विकार, साखर तपासणी आदी सुमारे १५० रुग्णांची तपासणी करण्यात आली. यावेळी २० जणांना पुढील उपचारासाठी रुग्णालयात दाखल करण्यात आले. त्याचप्रमाणे २ जणांना कोरोना तपासणीसाठी पाठविण्यात आले. यावेळी गावातील ‘कोरोना योद्धे’ म्हणून डॉक्टर्स, आशा सेविकांचा सत्कार करण्यात आला. हायस्कूलमध्ये विद्यार्थ्यांना मास्कचे वाटप करण्यात आले.

मानवाधिकार संघटनेचे जिल्हाध्यक्ष संदीप सूर्यवंशी यांनी प्रास्ताविक केले. अध्यक्ष आनंदराव नलवडे, नूतन उपसरपंच सागर चव्हाण यांनी मनोगत व्यक्त केले. यावेळी डॉ. ए. एस. जाधव, डॉ. एम. एच. पाटील यांच्यासह मान्यवर, मानवाधिकार संघटनेचे कार्यकर्ते उपस्थित होते. प्रशांत भोसले यांनी आभार मानले.