कुपवाडला उद्योजकाची नऊ लाखांची फसवणूक

कुपवाड : कुपवाड एमआयडीसीमधील उमेद टेक्सटाईल या कारखान्यामधील ओळखीचा फायदा घेऊन इचलकरंजीतील व्यापारी बापलेकांनी काॅटन यार्नच्या ११७ बॅगा नेऊन ९ लाख ४२ हजारांची फसवणूक केली. याबाबतची तक्रार उद्योजक सतीश मालू यांनी कुपवाड एमआयडीसी पोलीस ठाण्यात दाखल केली. पोलिसांनी गुन्हा दाखल केला आहे.

रामस्वरूप मदनलाल बोहरा, अंकित रामस्वरूप बोहरा (दोघेही रा.ब्लाॅक नंबर ७१, स्वप्नमंती, राजर्षी शाहू मार्केट, इचलकरंजी) अशी गुन्हा दाखल झालेल्या संशयितांची नावे आहेत. पोलिसांनी दिलेली माहिती अशी की, इचलकरंजीमधील कापड व्यापारी रामस्वरूप बोहरा व अंकित बोहरा मार्च, २०२१ ते १३ जुलै, २०२१ या कालावधीत कुपवाड एमआयडीसीतील उमेद टेक्सटाईल या कंपनीत येत होते. त्यांनी कंपनीचे मालक सतीश मालू यांची भेट घेतली. जुनी ओळख सांगून त्यांचा विश्वास संपादन केला. बोहरा बापलेकांनी व्यवसाय अडचणीत असल्याने मदत मागितली. आपल्याकडे काॅटन यार्नचे ग्राहक आहेत, माल विकून पैसे देतो, असे सांगून ११७ बॅगा इचलकरंजीमधील स्वामी समर्थ ट्रान्सपोर्टच्या वाहनातून त्यांच्या महालक्ष्मी टेक्सकाॅम (इचलकरंजी) या कंपनीच्या नावाने नेला.

त्यानुसार, संशयित अंकित बोहरा यांनी तीन वेगवेगळ्या रकमेचे धनादेश दिले होते. ते बँकेतून परत आले होते. मालू यांनी बोहरा यांना रकमेची वेळोवेळी मागणी केली असता, त्यांनी रक्कम देण्यास टाळाटाळ केली. त्यामुळे मालू यांना फसवणूक झाल्याचे समजताच, बोहरा यांच्या विरोधात कुपवाड एमआयडीसी पोलीस ठाण्यात तक्रार दाखल केली. त्यानुसार, कुपवाड पोलिसांनी दोन जणांच्या विरोधात पोलिसांत गुन्हा दाखल केला आहे.