तिसऱ्या लाटेत मुलांना धोका; पण उपचारांसाठी बालरोगतज्ज्ञांची वानवा

लोकमत न्यूज नेटवर्क

सांगली : कोरोनाच्या तिसऱ्या लाटेत लहान मुलांना धोका असल्याचे तज्ज्ञ सांगत आहेत. या संकटाला तोंड देण्यासाठी शासकीय स्तरावर पुरेसे बालरोगतज्ज्ञ मात्र उपलब्ध नाहीत. सर्व शासकीय रुग्णालयांमध्ये अवघे १८ बालरोगतज्ज्ञ आहेत. त्यामुळे खासगी डॉक्टरांना सोबत घेतल्याशिवाय तिसऱ्या लाटेला तोंड देणे शक्य नसल्याचे स्पष्ट आहे.

लहान मुलांना कोरोनाचा संभाव्य धोका लक्षात घेऊन जिल्हास्तरावर टास्क फोर्स स्थापन करण्यात आला आहे.

लहान मुलांमधील कोरोना संसर्गाला आळा घालणे, गंभीर व अतिगंभीर बालकांच्या उपचारांचे व्यवस्थापन करणे, औषधोपचारांची दिशा निश्चित करणे आदी कामे या फोर्सवर सोपवली आहेत. या युद्धसज्जतेमध्ये प्रत्यक्ष लढणाऱ्यांचीच कमतरता आहे. सांगली व मिरजेतील शासकीय रुग्णालयांत अवघे ८ बालरोगतज्ज्ञ आहेत. जिल्हाभरातील ग्रामीण व उपजिल्हा रुग्णालयांत ९ तज्ज्ञ आहेत. दोन ग्रामीण रुग्णालयांत मानद सेवा देणारे बालरोगतज्ज्ञ आहेत. ६१ प्राथमिक आरोग्य केंद्रांत एकही बालरोगतज्ज्ञ नाही. त्याशिवाय स्वतंत्र पॅरामेडिकल स्टाफही नाही. त्यामुळे अपुऱ्या मनुष्यबळाला हाताशी धरून कोरोनाच्या वादळाला तोंड कसे द्यायचे, हा मोठा प्रश्न आहे.

जुलै, ऑगस्टमध्ये तिसरी लाट येण्याची शक्यता असून यामध्ये लहान मुले मोठ्या प्रमाणावर बाधित होण्याची शक्यता वर्तविली जात आहे. त्यासाठी मिरज कोविड रुग्णालय, वॉन्लेस रुग्णालय, भारती रुग्णालय येथे बेड राखीव ठेवण्याचे नियोजन आहे. बालकांसाठी मास्क, ऑक्सिजन उपकरणे, खाटा यांचीही तयारी सुरू आहे. पहिल्या व दुसऱ्या लाटेला शासकीय रुग्णालयांनी समर्थपणे तोंड दिले, शिवाय खासगी रुग्णालयांनीही स्वतंत्र उपचार सुरू केले. त्याच पद्धतीने तिसऱ्या लाटेतही लहान मुलांसाठी सर्व खासगी बालरोगतज्ज्ञ मदतीला येतील, अशी प्रशासनाची अपेक्षा आहे. त्यादृष्टीने डॉक्टरांची माहिती घेण्याचे काम सुरू आहे.

चौकट

ग्रामीण भागात एकही बालरोगतज्ज्ञ

सांगली, मिरजेसोबत सर्व तालुक्यांच्या शहरांत बालरोग तज्ज्ञ आहेत; पण ग्रामीण भागात वानवा आहे. ६१ प्राथमिक आरोग्य केंद्रांत एकही बालरोगतज्ज्ञ नाही. माडग्याळसारख्या ग्रामीण रुग्णालयात मुलांसाठी गरजेनुसार खासगी डॉक्टर बोलावून घेतला जातो. खासगी डॉक्टर तर अजिबातच नाहीत. या स्थितीत कोरोनाबाधित मुलांना घेऊन सर्व पालक शहरांकडे धाव घेणार आहेत. हे लक्षात घेऊन जिल्हा प्रशासनाला सज्जता करावी लागेल.

चौकट

कोरोनाबाधित मुलांसाठी यंत्रणेची तयारी सुरू

लहान मुलांवरील उपचारांसाठी लागणाऱ्या सामग्रीची माहिती जिल्हाधिकाऱ्यांनी मागवली आहे. आनुषंगिक औषधे, साहित्य सामग्री यांची खरेदी वेळेत करण्याची सूचना दिली आहे. जिल्ह्यातील सर्व बालरोगतज्ज्ञांची, रुग्णालयांची व तेथील सुविधांची माहिती घेण्यास सांगितले आहे. तीव्रता वाढल्यास ही रुग्णालये आरक्षित करण्याचे प्रशासनाचे नियोजन आहे.

तिसऱ्या लाटेत मुले बाधित होणार हे गृहीत धरूनच प्रशासन तयारी करत आहे. शासनाच्या मार्गदर्शक सूचनांनुसार बालरोगतज्ज्ञांचा, शासकीय आरोग्य यंत्रणेतील वैद्यकीय अधीक्षक, वैद्यकीय अधिकारी यांच्या कार्यशाळेचे नियोजन करण्यात येत आहे.

चौकट

अंगणवाडी सेविका, आशा कार्यकर्त्यांचीही मदत

मुलांमधील कोरोनाचे लवकर निदान, घरगुती विलगीकरण याबाबत अंगणवाडी कर्मचारी आणि आशा कार्यकर्त्यांनाही मदतीला घेतले जाणार आहे. त्यांना प्रशिक्षण देण्यात येणार आहे.

ग्राफ

एकूण कोरोनाबाधित १,१३,२०८

बरे झालेले रुग्ण ९७,०६६

उपचाराखालील रुग्ण १२,८७६

१० वर्षांपेक्षी कमी वयाचे रुग्ण ३२७३

११ ते २० वर्षे वयोगटातील रुग्ण ७४३६

पॉइंटर्स

जिल्ह्यातील प्राथमिक आरोग्य केंद्रे ६१

बालरोगतज्ज्ञ ००

उपजिल्हा व ग्रामीण रुग्णालये १५

बालरोगतज्ज्ञ ११

जिल्हा रुग्णालय १

बालरोगतज्ज्ञ ४

कोट

तिसऱ्या लाटेत मुलांना धोका असल्याचे लक्षात घेऊन जिल्हास्तरीय टास्क फोर्स स्थापन केला आहे. बाधित होणाऱ्या मुलांवर उपचार आणि आवश्यक उपाययोजनांसाठी यंत्रणा सज्ज ठेवण्याच्या सूचना दिल्या आहेत. जिल्ह्यातील बालरोगतज्ज्ञांची यादी तयार करण्याचे तसेच त्यांची कार्यशाळा घेण्याच्याही सूचना दिल्या आहेत.

- डॉ. अभिजित चौधरी, जिल्हाधिकारी.