नेर्ले सोसायटीत ३ लाख ४० हजारांचा अपहार

कासेगाव : नेर्ले (ता. वाळवा) येथील नेर्ले क्र. १ सेवा सोसायटीमध्ये कर्ज प्रकरणासाठी खोटी व बनावट कागदपत्रे तयार करून ३ लाख ४० हजार ५०० रुपयांचा अपहार करून सोसायटी व जिल्हा बँक शाखेची फसवणूक केल्याप्रकरणी संस्थेच्या अध्यक्ष, तत्कालीन सचिव व तत्कालीन बँक निरीक्षक यांच्याविरोधात गुन्हा दाखल झाला आहे.

उपलेखापरीक्षक मानसिंग शिवाजीराव देसाई यांनी कासेगाव पोलिसांत फिर्याद दाखल केली आहे.

याबाबतची माहिती अशी, २५ एप्रिल २०१६ रोजी सोसायटी क्रमांक एकने रविराज पाटील यांना दीड लाख रुपये, श्रीमती शैलजा प्रकाश पाटील यांना दीड लाख रुपये, तर प्रसन्ना प्रकाश पाटील यांना ६५ हजार रुपये असे एकूण ३ लाख ६५ हजार रुपयांचे कर्ज मंजूर करण्यात आले. यापैकी रविराज पाटील यांना १ लाख ३० हजार ५०० रुपयांचा धनादेश दिला होता. रविराज पाटील यांनी रोख रक्कम काढल्याचे भासवून निरीक्षक दिलीप आरळेकर यांनी त्यांचा अकाउंट पे धनादेश खात्यामध्ये जमा केला नाही. अध्यक्ष सर्जेराव पाटील यांनी खात्यात अनधिकृत जमा झालेले एक लाख तीस हजार रुपये पाणीपुरवठा योजनेसाठी पूर्वी घेतलेल्या कर्जाची परतफेड केली.

रविराज पाटील यांची नावे खोटी व बनावट कागदपत्रे सचिव जयवंत हनुमंत पाटील यांनी अध्यक्षांना मदत करण्याच्या दृष्टीने तयार केली. बॅँक निरीक्षक आरळेकर यांनी पडताळणी न करता रक्कम अध्यक्ष सर्जेराव पाटील यांच्या नावे जमा करण्याकरिता मदत केली. सह्या व कागदपत्रे बनावट असतानाही निरीक्षक यांनी बेपर्वाई केली. संस्थेचे अध्यक्ष सर्जेराव गुंडा पाटील, तत्कालीन सचिव जयवंत हणमंत पाटील व जिल्हा बँक निरीक्षक दिलीप लक्ष्मण आरळेकर या तिघांनी मिळून संगनमत करून नेर्ले क्र. १ सर्व सेवा सहकारी सोसायटी व जिल्हा मध्यवर्ती बँक शाखेची ३ लाख ४० हजार ५०० रुपयांची फसवणूक केली असल्याची फिर्याद उपलेखा परीक्षक देसाई यांनी कासेगाव पोलिसांत दिली आहे.