मिरज पंचायत समितीच्या उपसभापतीची १७ फेब्रुवारीला निवड

उपसभापती दिलीपकुमार पाटील यांनी राजीनामा दिल्याने हे पद रिक्त आहे. १७ फेब्रुवारी रोजी ही निवड होणार आहे. भाजपने टाकळीचे सदस्य किरण बंडगर यांना उपसभापतीची संधी देण्याचे निश्चित झाले आहे. चार महिन्यानंतर उपसभापतिपदाचा उर्वरित कालावधी विरोधी काँग्रेस व राष्ट्रवादीच्या सदस्यांना देण्याचा निर्णय भाजप नेत्यांनी सभापती निवडीवेळी घेतला होता. मात्र तत्पूर्वी विरोधी काँग्रेसच्या गोटात उपसभापतीची निवडणूक लढविण्याच्या हालचाली सुरू झाल्या आहेत. तसे झाल्यास सत्ताधारी भाजपला ही निवडणूक आव्हानात्मक होणार आहे. भाजपची दोन अपक्ष सहयोगी सदस्यासह १२, काँग्रेसची स्वाभिमानी शेतकरी संघटनेच्या एका सहयोगी सदस्यासह आठ, राष्ट्रवादी एक असे सदस्यांचे पक्षीय बलाबल आहे. भाजपकडे बहुमत असल्याने उपसभापती भाजपचा होणार असे चित्र आहे. काँग्रेसने उपसभापतीची निवडणूक लढविण्याचा निर्णय घेतल्यामुळे सत्ताधारी भाजप नेत्यांच्या अस्तित्वाची ठरणार आहे. भाजपचे काही सदस्य ही निवड बिनविरोध करण्यासाठी प्रयत्नशील असले तरी पक्षांतर्गत नाराजी मिटविण्यात ते कितपत यशस्वी होतात यावर निवडीचे भवितव्य अवलंबून आहे.

चौकट

निवडीवर ग्रामपंचायत निवडणुकीचे पडसाद शक्य

ग्रामपंचायत निवडणुकीत भाजपमध्ये फूट पडली. अनेक गावांत पक्षांतर्गत दोन गट एकमेकांविरोधात लढले. भाजप नेत्यांनी एकोप्यासाठी प्रयत्न केले नाही अथवा राजकीय पाठबळ देण्यात दुजाभाव केल्याच्या भावनेतून भाजपमधील एक गट नाराज आहे. तो पंचायत समितीच्या राजकारणाशी निवडीत असल्याने नाराजीचे पडसाद उपसभापती निवडीवर उमटण्याची शक्यता आहे. त्यामुळे या नाराजीचा फटका भाजपला बसणार की विरोधी काँग्रेस याचा लाभ घेत सत्तेत चमत्कार घडविणार या बदलत्या राजकारणाकडे तालुक्याचे लक्ष लागून आहे.