दुहेरी खून अनैतिक संबंधातून

अखेर छडा : चुलत दिराला कर्नाटकातील जंगलात अटक; खुनाची कबुली
शेगाव : अत्यंत गुंतागुंत व आव्हानात्मक बनलेल्या दरीबडची (ता. जत) येथील दुहेरी खून अनैतिक संबंधातून झाल्याची धक्कादायक माहिती पोलिसांच्या तपासातून उजेडात आली आहे. मृतदेहांची ओळख पटल्यानंतर पोलिसांनी अवघ्या २४ तासांत खुनाचे कारण व संशयितास अटक करण्यात यश आले आहे. हा खून मृत अनिता कुन्नूर हिचा दीर चिदानंद हणमंत कुन्नूर (वय २७, रा. तिकोटा, ता. विजापूर) याने केल्याचे निष्पन्न झाले आहे. त्याला सावळगी (ता. अथणी) येथील जंगलातून अटक करण्यात आली आहे. त्याने हातोड्याने घाव घालून अनिता व तिची मुलगी वैष्णवीचा खून केल्याची कबुली दिली आहे.
येथील वनविभागाच्या हद्दीत विवाहितेसह तिच्या चार वर्षाच्या मुलीचा चार दिवसांपूर्वी खून केल्याचे उघडकीस आले होते. तब्बल चार दिवसानंतर मृतदेहांची ओळख पटल्यानंतर तपासाला गती मिळाली होती.
अनिताचा पती मड्याप्पा हा द्राक्ष पॅकिंगचा व्यवसाय करतो. व्यवसायानिमित्त तो चार-पाच महिने बाहेर असायचा. या काळात अनिताचे तिचा चुलत दीर चिदानंदशी अनैतिक संबंध जुळून आले. चिदानंद ट्रॅक्टरवर चालक म्हणून काम करीत होता. जानेवारी महिन्यात या दोघांनी पलायन केले. अनिताने सोबत वैष्णवीला नेले होते. तीन आठवडे ते कोल्हापुरात राहिले होते. त्यानंतर तो अनिताला घेऊन तिकोटाला आला. नातेवाईकांना हा प्रकार समजल्यानंतर त्यांंनी गावातील पंचांकडे तक्रार केली होती. पंचांनी मध्यस्थी करुन हे प्रकरण मिटविले होते. त्यानंतर या दोघांनी पुन्हा गावातून पलायन केले. ते कोल्हापुरात आश्रयाला गेले. या काळात चिदानंदला दारुचे व्यसन लागले.
दारुच्या नशेत तो अनिताचा शारीरिक व मानसिक छळ करु लागला. यामुळे अनिता त्याच्याकडे गावी जाण्यासाठी तगादा लाऊ लागली. गावाकडे नाही नेलेस, तर तुझ्याविरुद्ध पोलिसांत तक्रार देईन, अशी धमकी देत होती. यामुळे गेल्या आठवड्यात तो अनिता व वैष्णवीला घेऊन गावाकडे परत येण्यास निघाला. गुरुवारी रात्री त्यांनी गुड्डापूर (ता. जत) येथे मुक्काम केला. शुक्रवारी सकाळी देवदर्शन करुन ते गावाकडे जाण्यास निघाले होते. दरीबडची येथे चिदानंदने अतिमद्य प्राशन केले. याठिकाणीच रस्त्यावर पंक्चर काढण्यासाठी उभारलेल्या ट्रॅक्टरमधून त्याने हातोडा घेतला. जंगलात गेल्यानंतर ते जेवणासाठी थांबले. जेवण झाल्यानंतर अनिताने पुन्हा गावाकडे कधी जायचे, अशी विचारणा केली. यातून दोघांमध्ये कडाक्याचे भांडण झाले. संतापाच्या भरात त्याने अतिनाच्या डोक्यात हातोडा घातला. हा प्रकार पाहून वैष्णवी पुढे आली. त्यावेळी त्याने तिच्याही डोक्यात हातोडा घातला. दोघी मृत झाल्याची खात्री पटल्यानंतर त्याने पलायन केले. (वार्ताहर)