श्वानदंशाने १२ जनावरांचा मृत्यू

शेगाव : आवंढी (ता. जत) येथे पिसाळलेल्या कुत्र्याने चावा घेतल्याने १२ जनावरे दगावली. यात शेतकऱ्यांचे सुमारे पाच लाख रुपयांचे नुकसान झाले आहे. याबाबत पशुवैद्यकीय अधिकाऱ्यांना शेतकऱ्यांनी कळवूनही वेळेत रेबिजची लस दिली नसल्याने या जनावरांचा मुत्यू झाला असल्याचा शेतकऱ्यांचा आरोप आहे.

आवंढीत गेल्या आठवड्यात काही पिसाळलेल्या कुत्र्यांनी धुमाकूळ घातला होता. या कुत्र्यांनी गावातील एक बैल, पाच गायी, त्यांची चार लहान पिले व दोन म्हसींचा चावा घेतला. याबाबत परिसरातील शेतकऱ्यांनी आवंढी पशुवैद्यकीय डॉक्टरांना याबाबत माहिती दिली. मात्र वेळेत उपचार झाले नाहीत. आणखीनही जनावरांना पिसाळलेल्या कुत्र्यांनी चावा घेतला आहे. त्यांनाही रेबिज झाल्याचा संशय आहे. त्यांना वेळेत उपचार न मिळाल्यास तीही दगावण्याची शक्यता व्यक्त होत आहे.

चाैकट

नुकसानभरपाईची मागणी

शासनाने लाखो रुपये खर्चून आवंढी येथे श्रेणी १ दर्जाच्या पशुवैद्यकीय रुग्णालयाची प्रशस्त इमारत बांधली आहे; मात्र येथे कायमस्वरूपी डॉक्टर मिळालेला नाही. कित्येक वर्षांपासून प्रभारी अधिकाऱ्यांकडे कारभार देण्यात आला आहे. परिणामी वेळेत उपचार होत नसल्याने डोळ्यादेखत मृत्यू होताना पाहावे लागत आहे. या प्रकाराची चौकशी करून संबधित शेतकऱ्यांना नुकसानभरपाई द्यावी अशी मागणी होत आहे.