जांभळेवाडीतील उच्च शिक्षित दाम्पत्याच्या विजयाची चर्चा

लोकमत न्यूज नेटवर्क

शिराळा : जांभळेवाडी (ता. शिराळा) येथे नुकत्याच झालेल्या ग्रामपंचायत निवडणुकीत राज्यशास्त्र विषयात पीएच.डी. मिळवलेले डॉ. सचिन मरळे विजयी झाले. स्थानिक राजकारणात तरुण, सुशिक्षित लोक येत नाहीत, याबद्दल अनेक वेळा चर्चा होते. आता यात हळूहळू बदल होतोय, हेच मरळे यांच्या विजयाने सिद्ध झाले आहे.

जांभळेवाडी गावातसुद्धा दोन नवे चेहरे सध्या चर्चेत आहेत. डॉ. सचिन हैबती मरळे आणि त्यांच्या पत्नी रेश्मा सचिन मरळे. दोघेही उच्चशिक्षित आहेत.

सचिन मरळे यांनी राज्यशास्त्रातून पीएच.डी. मिळवली आहे, तर त्यांच्या पत्नी वाणिज्य शाखेच्या पदवीधर आहेत. सचिन मरळे यांचा पीएच.डी.साठी ‘सांगली जिल्ह्यातील विकासाचे राजकारण’ हा संशोधनाचा विषय आहे. सचिन मरळे यांना संशोधनासाठी आयसीएसएसआर या संस्थेची फेलोशिप मिळाली होती. या निवडणुकीत पती-पत्नी दोघेही एकाच वेळी निवडून आल्याने मरळे कुटुंबात आनंदी वातावरण आहे.

सचिन मरळे हे उच्चशिक्षित असले, तरी त्यांचे शेतीवरसुद्धा विशेष लक्ष आहे. सध्या त्यांच्याकडे चार एकर शेती आहे. याचसोबत पशुपालन व्यवसायही ते नेटाने करत आहेत. गावातील युवापिढीला शेतीत नवीन प्रयोग करण्यासाठी प्रयत्न करणार असल्याचे ते सांगतात. गावात वाचनालय असावे, अभ्यासिका असावी यासाठी ते प्रयत्न करणार आहेत.

कोट

आमच्या अख्ख्या पिढीत कुणीही कधीही राजकारणात सहभाग घेतला नाही. एकदा मोठ्या मुलाने निवडणूक लढवली होती, मात्र तो निवडून आला नाही. या वेळी मात्र एकाच वेळी मुलगा आणि सून दोघे निवडून आल्याने खूप आनंद झाला आहे.

- हैबती मरळे (सचिन यांचे वडील)

फोटो-२९सचिन मरळे