तासगाव पालिकेत सर्वपक्षीय डीआरडी पॅटर्नची चर्चा

तासगाव : तासगाव नगरपालिका निवडणुकीला अद्याप बराच कालावधी आहे. मात्र आतापासूनच इच्छुक आणि नेत्यांकडून जुळवाजुळव सुरु आहे. गतवेळच्या निवडणुकीत भाजप, राष्ट्रवादी आणि काँग्रेस असा तिरंगी सामना झाला होता. मात्र यावेळी शहरातील प्रमुख पदाधिकाऱ्यांकडून आमदार आणि खासदारांशिवाय मोर्चेबांधणी करण्यासाठी चाचपणी सुरू आहे. शहराच्या अस्मितेसाठी शहरातीलच प्रमुख पदाधिकाऱ्यांनी एकत्रित येत डीआरडी पॅनेल तयार करून नवा पॅटर्न राबवण्याची चर्चा शहरात सुरू आहे.

तालुक्यातील सर्वाधिक महत्वाचे सत्ताकेंद्र म्हणून तासगाव नगरपालिकेकडे पाहिले जाते. तालुक्याच्या राजकारणाचा निर्णायक कल ठरवण्याची भूमिका तासगाव शहरातूनच होते. त्यामुळे तत्कालीन मंत्री आर. आर. पाटील, खासदार संजयकाका पाटील, आमदार सुमनताई पाटील यांच्याकडून शहरावर वर्चस्व ठेवण्यासाठी सातत्याने प्रयत्न राहिला होता. गतवेळेच्या निवडणुकीत आर. आर. पाटील यांच्या पश्‍चात आमदार सुमनताई पाटील यांनी राष्ट्रवादीची धुरा हातात घेतली. काँग्रेसकडून तालुकाध्यक्ष महादेव पाटील यांनी स्वत:ची ताकद आजमावून पाहिली. मात्र या निवडणुकीत खासदार संयजकाका पाटील यांच्या नेतृत्वावर विश्‍वास ठेवून तासगावकरांनी पालिकेचा कौल भाजपला दिला.

अपवाद वगळता अनेक वर्षांपासून तासगाव शहराची सर्व सूत्रे खासदार संजयकाका पाटील किंवा तत्कालीन मंत्री आर. आर. पाटील यांच्या ताब्यात राहिली. शहराचा कारभार अंजनी आणि चिंचणीतूनच होत असल्याबाबत अनेकदा आरोपांच्या फैरी झडल्या. दोन्ही नेत्यांच्या इर्षेतून शहराकडे अधिकाधिक लक्ष केंद्रित होत होते. मात्र बदलत्या राजकीय समीकरणांमुळे शहरात नाराजीचा सूर आहे.

आमदार आणि खासदारांच्या अंडरस्टँडिंगच्या राजकारणामुळे यावेळी होणाऱ्या निवडणुकीत तासगाव नगरपालिकेसाठी शहरातीलच नेत्यांकडून सक्षम तिसरा पर्याय देण्याच्या हालचाली सुरू झाल्या आहेत. दोन्ही नेत्यांना वगळून शहरातील सर्वपक्षीय पदाधिकारी आणि प्रमुख कार्यकर्त्यांची एकत्रित मोट बांधून डीआरडी पॅनलचा पर्याय चर्चेत आणला जात आहे. शहरातीलच कारभाऱ्यांकडून शहराच्या सर्वांगीण विकासासाठी सुरू असलेल्या या पर्यायाला वर्षानुवर्षे अंजनी आणि चिंचणीचा झेंडा खांद्यावर घेतलेल्या कारभाऱ्यांकडून कितपत प्रतिसाद मिळतो, यावरच या डीआरडी पॅटर्नचे भवितव्य ठरणार असून अद्याप तरी याबाबल पडद्यामागे खलबते सुरू असल्याचे दिसून येत आहे.

चौकट :

आमदार, खासदारांच्या अंडरस्टँडिंगने बदलती समीकरणे

खासदार संजयकाका पाटील आणि आमदार सुमनताई पाटील यांचे अलीकडच्या काळात एकमेकांच्या अंडरस्टँडिंगने राजकारण सुरू असल्याची चर्चा आहे. या चर्चेवर शिक्कामोर्तब होणाऱ्या घडामोडीही सातत्याने घडताना दिसून येत आहेत. त्यामुळे नगरपालिका निवडणुकीत दोन्ही नेत्यांकडून अंडरस्टँडिंगचे राजकारण होण्याचीही शक्यता व्यक्त होत आहे. ही शक्यता गृहीत धरुनच शहरातील काही प्रमुख पदाधिकाऱ्यांनी दोन्ही नेत्यांना वगळून स्वतंत्र मोर्चेबांधणी करण्यासाठी चाचपणी सुरू केली आहे.

चौकट :

चर्चेतील डीआरडी पॅटर्न

माजी आमदार दिनकरआबा पाटील, माजी उपमुख्यमंत्री आर. आर. पाटील आणि माजी नगराध्यक्ष डी. एम. पाटील या तीन दिवंगत नेत्यांच्या नावाची इंग्रजीतील सुरुवातीची अक्षरे एकत्रित करून डीआरडी पॅनल तयार करण्याचा प्रयत्न सुरू आहे. याबाबत अद्याप कोणत्याच पदाधिकाऱ्यांकडून अधिकृत शिक्कामोर्तब केलेले नाही. मात्र गेल्या काही दिवसांपासून याविषयी जोरदार घडामोडी घडत असून शहराच्या अस्मितेचा मुद्दा घेऊन भेटीगाठी आणि बैठकांचे सत्र सुरू झाले आहे.