गेल ऑम्वेट यांच्या निधनाने सामाजिक चळवळीत मोठी पोकळी

सांगली : सामाजिक चळवळीच्या नेत्या, विदुषी डॉ. गेल ऑम्वेट यांनी महिला, दलित, भटक्या समाजाच्या हक्कांसाठी चळवळी उभ्या केल्या. महात्मा जोतिबा फुले, छत्रपती शाहू महाराज, डॉ. बाबासाहेब आंबेडकरांच्या विचारांचा अभ्यास करून त्यांनी तो सामान्यांपर्यंत पोहोचविला. गेल यांच्या निधनामुळे सामाजिक चळवळीत मोठी पोकळी निर्माण झाली आहे, अशा प्रतिक्रिया जिल्ह्यातील सामाजिक क्षेत्रात कार्यरत मान्यवरांनी व्यक्त केल्या.

कोट

डॉ. भारत पाटणकरांच्या पत्नी, विविध सामाजिक चळवळींच्या आघाडीच्या नेत्या डॉ. गेल ऑम्वेट यांच्या निधनाने विविध चळवळींची, पाटणकर परिवाराची मोठी हानी झाली आहे. गेल मूळच्या अमेरिकन असल्या तरी त्यांनी भारतीय सामाजिक व्यवस्थेचा अभ्यास केला होता. त्यांनी आंतरराष्ट्रीय दर्जाची पंचवीसहून अधिक पुस्तके लिहिली.

-आनंदराव पाटील, पाणी चळवळीचे नेते, आटपाडी.

कोट

डॉ. गेल ऑम्वेट तथा शलाका पाटणकर यांचा स्त्री-चळवळीचा संघर्ष आदर्शवत आहे. पाश्चात्य स्त्रियांच्या बाबतीतील अनेक अफवा आपल्याकडे आहेत; परंतु पतिव्रतेप्रमाणे गेल आणि भारत पाटणकर यांनी संसार केला आहे. गेल यांच्या जाण्याने विशेषत: स्त्री-चळवळीत न भरून येणारी पोकळी निर्माण झाली आहे. आदिवासी स्त्रीपासून ते पश्चिम महाराष्ट्रातील स्त्रीमजूर, दलित महिलांपर्यंत उपेक्षितांच्या प्रश्नांसाठी त्यांनी संघर्ष उभा केला होता.

-डॉ. बाबूराव गुरव, ज्येष्ठ विचारवंत.

कोट

डॉ. गेल ऑम्वेट यांनी देशाच्या विविध विद्यापीठांतील विद्यार्थी व प्राध्यापकांमध्ये समाजशात्र सोप्या पद्धतीने मांडले होते. त्या चालतेबोलते विद्यापीठ होत्या. महिला, दलित, भटक्या समाजाच्या हक्कांसाठी त्या लढल्या आणि त्यांनी न्यायही मिळवून दिला. त्यांच्या निधनाने सामाजिक चळवळीत मोठी पोकळी निर्माण झाली आहे.

- प्रा. सुषमा नायकवडी, माजी सभापती, जिल्हा परिषद, सांगली

कोट

अमेरिकेसारख्या प्रगत राष्ट्रात शिक्षण घेऊन सामाजिक जातिव्यवस्थेच्या बदलाचा अभ्यास करण्यासाठी भारतात आल्या. येथील प्रत्येक मागास घटकापर्यंत जाऊन त्यांच्यात जागृती करून त्यांच्या न्याय्य हक्कासाठी लढल्या. महात्मा जोतिबा फुले यांच्या सामाजिक कार्याचा अभ्यास करतानाच त्यांनी महाराष्ट्रातील थोर संतांचाही मोठा अभ्यास केला होता. त्यांची सर्व पुस्तके समाजाचा विकास करणारी अशीच आहेत.

- धनाजी गुरव, कार्याध्यक्ष, विद्रोही सांस्कृतिक चळवळ.

कोट

पुढारलेल्या अमेरिका राष्ट्रात पीएच.डी. करूनही डाॅ. गेल ऑम्वेट यांनी भारतीय नागरिकत्व स्वीकारून देशातील विषमतेचा अभ्यास केला. महिलांना समान हक्क मिळावेत, यासाठी त्यांनी मोठा लढा दिला होता.

-ॲड. के. डी. शिंदे, जिल्हाध्यक्ष, जनता दल