आष्ट्यातील मुस्लिम युवकांकडून ऐक्याचे दर्शन

फोटो: आष्टा येथील सामाजिक संस्थेच्यावतीने शकील मुजावर व सहकारी यांचा गौरव करण्यात आला.

सुरेंद्र शिराळकर

लोकमत न्यूज नेटवर्क

आष्टा : येथील मुस्लिम समाजातील सामाजिक कार्यकर्त्यांनी कोरोना काळात सामाजिक बांधीलकी जपली आहे. त्यांनी मुस्लिम समाजाबरोबर हिंदू समाजातील कोरोनाने मृत झालेल्या रुग्णांच्या मृतदेहावर कोणताही मोबदला न घेता अंतिम संस्कार करत माणुसकीची ज्योत तेवत ठेवली आहे.

आष्टा येथील जलसंपदा मंत्री जयंत पाटील यांचे कट्टर समर्थक शकील मुजावर यांना कोरोनाची लागण झाली. या संकटावर त्यांनी मात केली मात्र या संकटकाळात माणुसकी जिवंत ठेवण्यासाठी काय करावे याचा त्यांनी ध्यास घेतला. कोरोनाने मृत्यू पावलेल्या नागरिकांच्यावर अंतिम संस्कार करताना अडचणी निर्माण होत आहेत. हे पाहून शकील मुजावर, अझरूद्दीन मुजावर,अरिफ फकिर, कलंदर मुजावर, साजिद मुलानी, इम्रान मेहताब, इसाक मुजावर, फिरोज टेमकर यांच्यासह १४ युवकांनी रुहानिया मदरसा मस्जिद दफन कमिटी स्थापन केली. याबाबत तहसील कार्यालय व पालिकेची मान्यता घेण्यात आली. या कमिटीच्या माध्यमातून आष्टा व परिसरात कोरोनाने मृत्यू झालेल्या रुग्णांच्या मृतदेहावर अंत्यसंस्कार करण्यात येत आहे. मुस्लिम समाजाबरोबर हिंदू समाजातील ही व्यक्तींवर अंतिम संस्कार करत शकील मुजावर व सहकारी यांनी सामाजिक बांधीलकी जपली आहे

चौकट :

तरुणांसाठी मार्गदर्शक

शकील मुजावर व त्यांच्या सहकाऱ्यांनी समाजातील गोरगरीब गरजूंना आजवर अनेकवेळा मदत केली आहे. त्यांना संसारोपयोगी साहित्य देतात. मात्र, त्याची कुठेही वाच्यता करत नाहीत. त्यांचे काम युवापिढीला मार्गदर्शक ठरत आहे.