देशातील पहिले व्हर्च्युअल कृषी प्रदर्शन सांगलीत

सांगली : राष्ट्रवादीच्यावतीने यंदा जयंत पाटील यांच्या वाढदिवसानिमित्त व्हर्च्युअल कृषी प्रदर्शनाचे आयोजन केले असून, भारतातील अशाप्रकारचे हे पहिलेच प्रदर्शन आहे, अशी माहिती पक्षाचे शहर जिल्हाध्यक्ष संजय बजाज यांनी शनिवारी पत्रकार परिषदेत दिली.

ते म्हणाले की, काेरोनामुळे यंदा प्रत्यक्ष प्रदर्शन भरविणे अडचणीचे असल्याने त्यातून आम्ही हा मार्ग काढला. मोबाईल ॲपच्या माध्यमातून हे व्हर्च्युअल कृषी प्रदर्शन पार पाडले जाणार आहे. त्याला मोठा प्रतिसाद मिळाला. ऑनलाईन पद्धतीने होणाऱ्या या प्रदर्शनात देश-विदेशातील कंपन्या, बँका, शासकीय अधिकारी, विविध कृषी साहित्य, शेतीतील यशस्वी प्रयोग, संशोधन, उत्पादनाच्या वेगवेगळ्या पद्धती याविषयीच्या माहितीचा खजाना उपलब्ध होणार आहे. याच प्लॅटफॉर्मवर कृषी साहित्याच्या खरेदी-विक्रीचा व्यवहारही होणार आहे. प्रत्यक्षातील प्रदर्शनापेक्षा अनेक पर्याय यात उपलब्ध आहेत. १५ ते २८ फेब्रुवारीपर्यंत हे प्रदर्शन उपलब्ध राहणार आहे.

ज्या शेतकऱ्यांकडे मोबाईल किंवा इंटरनेटचा पर्याय उपलब्ध नाही, त्यांच्यासाठी गावपातळीवर स्क्रीन मोबाईल व्हॅन उपलब्ध करून याची माहिती दिली जाईल. या अनोख्या प्रदर्शनाचा लाभ शेतकऱ्यांनी घ्यावा, असे आवाहन बजाज यांनी केले. मोबाईलच्या माध्यमातून अशाप्रकारचा हा देशातील पहिलाच प्रयोग आहे, असे राजेश शहा यांनी सांगितले. यावेळी कमलाकर पाटील, राहुल पवार आदी उपस्थित होते.