महापालिकेत आता चार उपायुक्त, आठ सहायक आयुक्त

सांगली : अपुऱ्या मनुष्यबळामुळे महापालिकेचा कारभार कोलमडलेला असतानाच, आयुक्त नितीन कापडणीस यांनी तब्बल २३ वर्षांच्या प्रतीक्षेनंतर आकृतीबंध व सेवा प्रवेश नियमावली अंतिम केली आहे. नव्या आकृतीबंधामुळे महापालिकेत अडीच हजार नव्या पदांची निर्मिती होणार आहे. शासनाच्या मान्यतेनंतर महापालिकेला चार उपायुक्त, आठ सहायक आयुक्तांसह विविध विभागाला स्वतंत्र अधिकारी मिळणार आहे.

सांगली, मिरज आणि कुपवाड या तीन शहरांची मिळून महापालिका झाली, शहराचा विस्तार वाढला, लोकसंख्या वाढली; पण त्यानुसार महापालिकेच्या आस्थापनेवरील कर्मचाऱ्यांची संख्या वाढू शकली नाही. त्याचा ताण प्रशासकीय कामकाजावर पडत होता. महापालिकेच्या आस्थापनेवर सध्या २३७८ पदे मंजूर आहेत. त्यापैकी दीड हजार कर्मचाऱ्यांवरच प्रशासनाचा गाडा हाकला जात आहे. एकेका अधिकाऱ्यांकडे तीन ते चार विभागांचा पदभार सोपविण्यात आला आहे. गेल्या २३ वर्षांपासून सुधारित आकृतीबंध व सेवाप्रवेश नियमही तयार करण्यात आलेले नव्हते.

आयुक्त कापडणीस यांनी पदभार हाती घेतल्यानंतर सुधारित आकृतीबंध व सेवाप्रवेश नियमावली तयार करण्याचे आदेश दिले. दोन वर्षांत पाठपुरावाही केला. त्यामुळे आता महापालिकेत २४५५ नव्या पदांची निर्मिती होणार आहे. सध्या महापालिकेकडे दोन उपायुक्त आहेत. त्यांची संख्या आता चार होईल, तर चारऐवजी आठ सहायक आयुक्त असणार आहेत. याशिवाय वैद्यकीय अधिकारी ५, शाखा अभियंता १५, कनिष्ठ अभियंता २२, नर्स २४, लिडिंग फायरमन २१, फायरमन १४३, वरिष्ठ लिपिक ६०, तर सफाई कामगारांची ११८४ नवी पदे निर्माण होतील.

चौकट

वशिलेबाजीला चाप

महापालिकेत सध्या नोकरभरतीवर निर्बंध आहेत. त्यामुळे कंत्राटी व मानधनावरील कर्मचाऱ्यांची संख्या अधिक आहे. त्यात विविध पदांवरील कर्मचाऱ्यांसाठी सेवानियम अस्तित्वात नव्हते. त्यामुळे शैक्षणिक पात्रता, वय, अनुभवाचा विचार न करता वशिलेबाजीने कर्मचारी भरती केली जात होती. आता सेवा भरती नियमावलीही तयार करण्यात आली आहे. त्यामुळे वशिलेबाजीला चाप बसणार आहे.

कोट

महापालिकेच्या स्थापनेपासून आकृतीबंध तयार करण्यात आलेला नव्हता. त्यामुळे सध्याच्या कर्मचाऱ्यांवर कामाचा ताण वाढला होता. नवीन आकृतीबंधाबाबत हरकती व सूचना मागविल्या आहेत. त्यानंतर महासभेच्या मान्यतेने शासनाकडे मंजुरीसाठी पाठविला जाईल. शहराचा वाढता विस्तार, गतिमान कारभारासाठी पदनिर्मिती महत्त्वाची होती. यामुळे कामकाजात सुसूत्रता येण्यास मदत होईल.

- नितीन कापडणीस, आयुक्त

चौकट

पदसंख्येचा तपशील

वर्ग मंजूर पदे नवनिर्मित पदे एकूण

अ २९ २० ४९

ब ३९ ३७ ७६

क ८४२ ७७८ १६२०

ड १४६८ १६२० ३०८८

एकूण २३७८ २४५५ ४८३३