महापालिकेच्या अभ्यासिकेला कार्पोरेट लूक

लोकमत न्यूज नेटवर्क

सांगली : महापालिकेच्या जळमटलेल्या कार्यालयांना आता कार्पोरेट लूक दिला जात आहे. पालिकेची अभ्यासिकाही अत्याधुनिक सोयीसुविधांनी नुकतीच सज्ज करण्यात आली. सीसीटीव्ही, ऑनलाईन मार्गदर्शनासह विविध सुविधा स्पर्धा परीक्षांचा अभ्यास करणाऱ्या मुलांसाठी उपलब्ध करून देण्यात आल्या आहेत. अडीच हजार पुस्तकांचा संचही ठेवण्यात आला आहे. त्यामुळे स्पर्धा परीक्षेची तयारी करणाऱ्या मुलांना पहिल्यांदाच या सुविधा उपलब्ध होत आहेत.

आयुक्त नितीन कापडणीस यांनी काळी खण, आमराई सुशोभिकरणासह अनेक प्रकल्प हाती घेतले आहेत. तत्कालीन नगरपालिकेच्या काळापासून वि. स. खांडेकर वाचनालयात अभ्यासिका होती. पण त्यात असुविधाच अधिक होत्या. आयुक्तांनी या अभ्यासिकेचे रुपडेच बदलले. या अभ्यासिकेत पिण्याच्या पाण्यासाठी कुलर लावण्यात आले आहेत. संपूर्ण परिसरावर सीसीटीव्ही कॅमेऱ्यांची नजर असेल. अभ्यासिका व वाचनालयाला कॉर्पोरेट लूक देण्यात आला आहे. उच्चपदस्थ अधिकाऱ्यांच्या मार्गदर्शनाची व्यवस्था केली आहे. त्यासाठी स्क्रीनची व्यवस्था केली आहे. वाचनालयात बायोमेट्रिक प्रवेशाची व्यवस्था आहे. खुर्च्या, टेबलही बदलली आहेत. अडीच हजार पुस्तकांचा संच अभ्यासासाठी ठेवला आहे. सध्या या अभ्यासिकेत ८० मुले-मुलींची नोंदणी आहे, तर १२० मुलांची बैठक व्यवस्था करण्यात आली आहे. पालकमंत्री जयंत पाटील यांच्याहस्ते या अभ्यासिकेचे नुकतेच लोकार्पण झाले. कोरोनाचा काळ संपताच ही अभ्यासिका खुली होणार असल्याचे आयुक्त कापडणीस यांनी सांगितले.

चौकट

एलबीटी कार्यालयात आयुर्वेदिक रुग्णालय

स्टेशन चौकातील एलबीटी कार्यालयाच्या दुसऱ्या मजल्यावर अत्याधुनिक असे आयुर्वेदीक रुग्णालय उभारण्यात येणार आहे. केरळमधील आयुर्वेदीक उपचार पध्दतीप्रमाणे पंचकर्मसह अन्य उपचारही होतील. खालच्या मजल्यावर विवाह नोंदणीचे कार्यालय सुरू करण्यात येणार आहे. विवाह नोंदणीसाठी स्वतंत्र सॉफ्टवेअर तयार करण्यात येत आहे. घरातून विवाह नोंदणीसाठी लागणारी सर्व कागदपत्रे अपलोड करू शकतील. केवळ प्रमाणपत्रासाठी नागरिक या कार्यालयात येतील, अशी व्यवस्था केल्याचे कापडणीस यांनी सांगितले.