कोरोना रुग्णालये भरली

कोविड स्पेशल रेल्वेसाठी वैद्यकीय कर्मचारी उपलब्ध नसल्याने या रेल्वेगाड्यांची प्रशासनाने अद्याप मागणी केलेली नाही. देशात कोरोना संक्रमणामुळे रुग्णालये अपुरी पडल्यास रेल्वेतर्फे गतवर्षी ‘कोविड स्पेशल’ रेल्वे गाड्या तयार करण्यात आल्या आहेत. कोविड स्पेशलमध्ये रुग्णांसाठी ऑक्सिजन व इतर उपचार सुविधांची व्यवस्था आहे. स्थानिक प्रशासनाने मागणी केल्यास कोविड स्पेशल रेल्वे पाठविण्यात येणार आहेत. सलग दुसऱ्या वर्षीही सांगली जिल्ह्यात कोरोना रुग्णांच्या संख्येत मोठी वाढ झाली आहे. शासकीय कोविड रुग्णालयासह सांगली व मिरजेतील खासगी रुग्णालये फुल्ल असून, बाधितांच्या उपचारांसाठी नातेवाइकांची धावपळ सुरू आहे. वाढत्या रुग्णसंख्येसाठी डॉक्टर, परिचारिका व उपचार सुविधा अपुऱ्या पडत असल्याने रुग्णांना उपचार मिळणे कठीण होत आहे.

त्यामुळे पुणे विभागाकडून कोविड स्पेशल रेल्वे गाड्या मिरजेत आणाव्यात यासाठी रेल्वे कृती समितीचे सचिव सुकुमार पाटील यांनी जिल्हा प्रशासनाकडे मागणी केली आहे. जिल्हाधिकाऱ्यांनी रेल्वेकडे मागणी केल्यास कोविड स्पेशल गाड्या मिरजेत दाखल होण्याची शक्यता आहे. कोविड स्पेशल रेल्वेसाठी मिरजेत पाणी व ऑक्सिजन पुरवठ्याची सोय आहे. राज्य शासनाकडून मागणी झाल्यास कोविड स्पेशल रेल्वे मिरजेत पाठविण्यात येईल असे रेल्वेच्या पुणे विभागीय अधिकाऱ्यांनी सांगितले.

कोविड स्पेशल रेल्वेत रुग्णांवर उपचारांसाठी डॉक्टर, परिचारिका व वैद्यकीय कर्मचाऱ्यांची व्यवस्था स्थानिक प्रशासनाने करायची आहे. मात्र, डाॅक्टर व वैद्यकीय कर्मचारी अपुरे असल्याने अद्याप कोविड स्पेशलची मागणी करण्यात आलेली नाही.

चाैकट -

गतवर्षी मिरज स्थानकात एक कोविड स्पेशल रेल्वेगाडी पाठविण्यात आली होती. मात्र उपचारांसाठी वापर झाला नसल्याने श्रमिक स्पेशल म्हणून परप्रांतीय कामगारांना गावी पाठविण्यासाठी या रेल्वेचा वापर करण्यात आला होता. कोविड स्पेशल रेल्वेचा विलगीकरणासाठीही वापर करता येतो. मात्र, गतवर्षी व यावर्षीही रेल्वेच्या कोविड स्पेशलसाठी कोणत्याही जिल्ह्यात मागणी झाली नसल्याचे सांगण्यात आले.