राजारामबापू व्याख्यानमालेच्या खर्चावरून वादंग

इस्लामपूर : राजारामबापू पाटील नगर व्याख्यानमालेच्या खर्चास मान्यता देण्याच्या विषयावरून सभागृहात दोन्ही बाजूंकडून जोरदार शेरेबाजी झाली. त्यामुळे वातावरण तापले होते. पेठ-सांगली रस्ता ते कोरे आप्पा घरापर्यंतच्या भूसंपादनासाठी बाधितांना तडजोडीने लाभ देण्याचा निर्णय झाला. तर शहरातील अतिक्रमणे काढून टाकण्यासाठी मुख्याधिकाऱ्यांना सर्वाधिकार देण्यात आले.

येथील पालिकेच्या नाट्यगृहात १६ जानेवारी रोजी तहकूब झालेली सर्वसाधारण सभा शुक्रवारी पुन्हा झाली. नगराध्यक्ष तथा पीठासीन अधिकारी निशिकांत भोसले-पाटील अध्यक्षस्थानी होते. मुख्याधिकारी अरविंद माळी यांची प्रमुख उपस्थिती होती.

पालिकेच्या राजारामबापू पाटील नगर व्याख्यानमालेसाठी झालेल्या खर्चाला मान्यता देण्याच्या विषयावर दोन्ही बाजूंच्या सदस्यांनी प्रश्न उपस्थित केले. या वेळी सुपारीबहाद्दर, उधळपट्टी, अवास्तव खर्च अशी शेरेबाजी परस्परांवर केली गेल्याने वातावरण तापले होते. मात्र नगराध्यक्ष पाटील यांनी सदस्यांना समज देत हे आक्षेपार्ह शब्द सभेच्या कामकाजातून काढून टाकल्याचे जाहीर केले. बऱ्याच वादावादीनंतर नगराध्यक्षांनी तीन लाख ५४ हजार रुपये खर्चाला मान्यता दिल्याचे जाहीर केले. तसेच नगर परिषदेच्या विविध विभागांसाठीच्या वार्षिक निविदा मागविण्यासाठीचा निर्णय झाला.

या सभेवेळी झालेल्या चर्चेत आनंदराव पवार, विक्रम पाटील, शकील सय्यद, वैभव पवार, अमित ओसवाल, सुप्रिया पाटील, प्रतिभा शिंदे, प्रदीप लोहार, संजय कोरे, शहाजी पाटील, विश्वनाथ डांगे, उपनगराध्यक्ष दादासाहेब पाटील, खंडेराव जाधव, डॉ. संग्राम पाटील, आनंदराव मलगुंडे, जयश्री माळी, संगीता कांबळे, सुनीता सपकाळ यांनी भाग घेतला.

चाैकट

पाणीपुरवठा धोरणाचा विषय वादळी

पालिकेकडून टॅँकरने होणाऱ्या पाणीपुरवठ्याबाबत धोरण ठरविण्याच्या विषयावर वादळी चर्चा झाली. पालिकेचे ट्रॅक्टर आणि टॅँकर बदलण्याच्या स्थितीत आले आहेत. पाण्यापासून कोणाला अपाय होऊ नये, यासाठी स्टीलचे टॅँकर भाडेतत्त्वावर घेण्याचा विषय नगराध्यक्ष पाटील यांनी सभागृहासमोर ठेवला. या वेळी अनेक सदस्यांनी पाण्याचे दर न वाढविता नगरसेवकांचा अधिकार अबाधित ठेवून सुलभ पाणीपुरवठा करण्याचा आग्रह धरला. शेवटी हा विषय तहकूब करण्यात आला.