‘कृष्णा’च्या रणांगणात घाटमाथ्यावर सहकार पॅनेलला काँग्रेसचे आव्हान

लोकमत न्यूज नेटवर्क

इस्लामपूर : घाटमाथ्यावरील कडेगाव आणि पलूस तालुक्यात कृष्णा साखर कारखान्याचे सभासद आहेत. या भागात भाजपचे अर्थात सहकार पॅनेलचे दोन आणि संस्थापक पॅनेलचे एक असे तीन संचालक आहेत. रयत पॅनेलच्या डॉ. इंद्रजित मोहिते यांचे पतंगराव कदम घराण्याशी जिव्हाळ्याचे संबंध असून, आता कृषी राज्यमंत्री विश्वजित कदम यांच्या पाठिंब्यावर मोहिते गट सहकार पॅनेलला आव्हान देण्याच्या तयारीत आहे.

घाटमाथ्यावर सहा हजारच्या आसपास सभासद संख्या आहे. वांगी येथे पाचशेहून अधिक सभासद आहेत. पृथ्वीराज देशमुख गटाचे ब्रिजराज मोहिते (वांगी) सहकार पॅनेलकडून संचालक आहेत. चिंचणी येथे तीनशेहून अधिक सभासद असून, पांडुरंग होनमाने सहकार पॅनेलचे संचालक आहेत. माेहिते वडगाव येथील पांडुरंग मोहिते हे अविनाश मोहिते यांच्या संस्थापक पॅनेलचे संचालक आहेत.

मागीलवेळी कदम घराण्याची भूमिका तटस्थ होती. आता राजकीय समीकरणे बदलली आहेत. रयत पॅनेलची ताकद वाढविण्यासाठी डॉ. इंद्रजित मोहिते आता कदम घराण्याची मदत घेतील, असे संकेत आहेत. कृषी राज्यमंत्री डॉ. विश्वजित कदम यांची साथ ज्यांना मिळणार, त्यांचेच घाटमाथ्यावर वर्चस्व राहणार आहे. राज्यात सध्या महाआघाडीची सत्ता असून, काँग्रेस, राष्ट्रवादी एकत्र आहेत. राष्ट्रवादीचे प्रदेशाध्यक्ष जयंत पाटील साखर कारखानदारांचे नेते आहेत. त्यामुळे कृष्णा कारखान्याच्या रणांगणावर जयंत पाटील आणि विश्वजित कदम यांची भूमिका महत्त्वाची ठरणार आहे. आगामी निवडणुकीत कदम घराण्याची मदत रयत पॅनेलला मिळाली, तर जयंत पाटील यांची भूमिका महत्त्वाची ठरणार आहे.