संस्था, विद्यालय व नागरिक यांना जोडणारा दुवा म्हणजे लिपिक : सुधाकर हसबनीस

लोकमत न्यूज नेटवर्क

शिराळा : संस्था, विद्यालय व नागरिक यांना जोडणारा दुवा म्हणजे लिपिक होय, असे प्रतिपादन हाय्यर एज्युकेशन सोसायटीचे अध्यक्ष सुधाकर हसबनीस यांनी केले.

शिराळा येथील न्यू इंग्लिश स्कूलमधील वरिष्ठ लिपिक जगन्नाथ जोशी व कनिष्ठ लिपिक प्रदीप जोशी हे निवृत्त झाले, त्याबद्दल त्यांचा गौरव व निरोप समारंभ आयोजित केला होता, त्यावेळी ते बोलत होते.

हसबनीस म्हणाले, लिपिक म्हणून त्यांनी आपले काम आदर्शवतच केले. कार्यालयीन कामकाजामध्ये या दोघांचाही हातखंडा होता. शाळेचा नावलौकिक वाढावा यासाठी त्यांनी सातत्याने प्रयत्न केले.

दरम्यान, शिक्षक दिनाचे औचित्य साधून आजपर्यंत विद्यालयातून सेवानिवृत्त झालेले माजी मुख्याध्यापक, पर्यवेक्षक, शिक्षक व शिक्षकेतर यांचा सत्कार करण्यात आला. याप्रसंगी माजी मुख्याध्यापक विसाजी हसबनीस, प्रदीप जोशी, जगन्नाथ जोशी यांनी मनोगत व्यक्त केले.

यावेळी ज्येष्ठ संचालक बाबूराव पवार, रमेश हसबनीस, रघुनाथ बुकशेटे, विद्द्या हसबनीस, संस्थेचे सहकार्यवाह प्रकाश नवांगुळ, सुनील नांद्रे, वसंत पाटील, मकरंद जोशी, संस्थेचे सर्व पदाधिकारी, सेवानिवृत्त माजी मुख्याध्यापक, पर्यवेक्षक, शिक्षक व शिक्षकेतर कर्मचारी उपस्थित होते.

मुख्याध्यापक अंगराज माजगावकर यांनी स्वागत केले. प्रशांत मोहिरे यांनी आभार मानले. कार्यक्रमाचे सूत्रसंचालन संजय सुक्ते यांनी केले.