कवठेएकंद : मतकुणकी (ता. तासगाव) येथे वादळी वा-याने घरावरील पत्रे उडाले, त्यासोबत पत्र्याच्या अँगलला बांधलेला पाळणाही चिमुकल्या बाळासह उडून, चारशे फूट लांब जाऊन पडला. या दुर्घटनेत नंदिनी संजय शिरतोडे (वय ४ महिने) या बालिकेचा मृत्यू झाला. ही घटना सोमवारी सायंकाळी सहाच्या सुमारास घडली. बालिकेच्या मृत्यूने परिसरात हळहळ व्यक्त होत आहे.
मतकुणकीतील कवठेएकंद-चिंचणी रस्त्यानजीक विश्वनाथ शिरतोडे पत्नी, मुलगा, सून व तीन नाती यांच्यासह राहतात. त्यांचा मुलगा संजय यांना चार महिन्यांपूर्वी नंदिनी ही तिसरी मुलगी झाली होती. सोमवारी सायंकाळी जोरदार वारे सुटले. त्यावेळी सर्वजण घरात होते. मात्र काही कळण्याच्या आतच जोरदार वारे घरात शिरले आणि घराचा पत्रा वाºयासह उडून गेला. या पत्र्याच्या अँगलला दोरीने पाळणा बांधला होता. पाळण्यात नंदिनी होती. अँगल व पत्र्यासह पाळणा तब्बल चारशे फूट अंतरावर जाऊन पडला. पाळणा पत्र्याखाली दबली गेल्याने नंदिनी गंभीर जखमी झाली होती. घरच्यांनी धावत जाऊन तिला उचलून घेतले व तात्काळ तासगाव प्राथमिक आरोग्य केंद्रात उपचारासाठी नेले होते. पण तिची प्रकृती गंभीर असल्याने सांगलीतील खासगी रुग्णालयात उपचारासाठी दाखल केले होते. पण रात्री साडेअकराच्या दरम्यान तिचा मृत्यू झाला. या घटनेमुळे परिसरात हळहळ व्यक्त होत आहे.
मंगळवारी घटनास्थळी आमदार सुमनताई पाटील, तहसीलदार कल्पना ढवळे, पंचायत समिती सभापती शुभांगी पाटील, मंडल अधिकारी प्रवीण माळवे, तलाठी लोणकर, सरपंच नेताजी पाटील, सर्जेराव पाटील, शिराज मुजावर आदींनी भेट दिली.आईचा आक्रोशवारे सुरू झाले तेव्हा चिमुकल्या नंदिनीला तिची आई नीता आपल्याकडे घेणार होती. तोपर्यंत वारे घरात घुसून काही कळण्याअगोदरच अँगल व छतासह पाळणा उडून गेला. छताखाली पाळणा दबला जाऊन चिमुकलीचा अंत झाला. घटनास्थळी आईचा आक्रोश हृदय पिळवटून टाकणारा होता. घरामध्ये सगळे असतानाही वादळापुढे हतबल व्हावे लागले आणि क्षणात चिमुकलीला गमवावे लागले.