जतमधील गंधर्व ओढ्याचे पात्र झुडपांमुळे गायब

फोटो ओळ : जतच्या गंधर्व ओढ्याच्या दक्षिणेकडील बाजूस असलेल्या काटेरी झाडाझुडपांमुळे ओढापात्र गायब झाले आहे.

लोकमत न्यूज नेटवर्क

जत : जत शहराच्या मध्यभागातून वाहणाऱ्या गंधर्व ओढापात्रात मोठ्या प्रमाणात काटेरी झुडपे वाढल्याने ओढापात्रच गायब झाले आहे. याकडे जत नगरपरिषदेचे दुर्लक्ष होत आहे. यामुळे पावसाळ्यात काठावर असलेल्या नागरीवस्तीला पाण्याचा धोका निर्माण होऊ शकतो.

येथील गंधर्व ओढ्याला ऐतिहासिक परंपरा आहे. नगरपरिषदेने जत शहरातून नैसर्गिकरित्या वाहणाऱ्या ओढापात्रातील झाडे झुडपे काढून या ओढापात्रात नगरोत्थान योजनेतून २०१६ मध्ये कोट्यवधी रुपये निधी उपलब्ध करून सिमेंट काँक्रीटचे नाला बांधकाम केले आहे.

यात नियमानुसार काम न करता खोलीकरणाचे काम कमी केले आहेत. काही ठिकाणी ओढापात्रातील दोन्ही बाजूला असलेली अतिक्रमणे काढली तर काही ठिकाणी ओढापात्रातील अतिक्रमणे न काढता सिमेंट काँक्रीटचे काम केले आहे. ओढापात्रातील रूंदीकरणाची कामे करीत असताना संबंधित ठेकेदारांनी नियमानुसार न करता नियमबाह्य केली आहेत. नगरोत्थान योजनेतून ओढापात्र खोलीकरण व विस्तारीकरण करण्याच्या नावाखाली हे गंधर्व ओढापात्राचे सिमेंट काँक्रीट नाल्यात रुपांतर करण्यात आले आहे.

शहराच्या मध्यवर्ती ठिकाणी हे ओढापात्र आहे. नगरपालिकेला या ओढापात्रातील झाडे, झुडपे व गाळ काढून हे ओढापात्र स्वच्छ ठेवता आले असते. ओढापात्रातील झाडेझुडपे काढून नैसर्गिक प्रवाह कार्यान्वित करणे शक्य होते. दक्षिणेकडे ओढापात्रात दोन्ही बाजूला दगडी पिचिंग काम केले आहेण त्या ओढापात्रात मोठ्या प्रमाणात काटेरी झाडे उगवून आली आहेत. त्यामुळे ओढापात्र अरुंद झाले आहे. पाण्याच्या प्रवाहाला अडथळा निर्माण झाला आहे.

चाैकट

ओढापात्र काटेरी झुडपात गायब झाले आहे.

पावसाळ्यात जास्त पाणी आले तर पाणी पात्राबाहेर पडणार आहे. ऐन पावसाळ्यात या ओढापात्रातील झाडाझुडपांमुळे जत शहरवासीयांना मोठ्या नैसर्गिक आपत्तीला सामोरे जावे लागणार आहे.

नगरपालिकेकडे स्वतःची जेसीबी मशीन आहे. याद्वारे ओढापात्रातील काटेरी झुडपे काढावीत. अशी मागणी होत आहे.