दीड कोटी कर्जाच्या आमिषाने सराफाला ४० लाखांचा गंडा

मिरजेतील सराफ रमेश किवटे यांना दीड कोटीचे कर्ज मंजूर झाल्याचे सांगून कर सल्लागार सचिन देशपांडे, अजय पवार ऊर्फ अभिषेक भंडारे, श्रीमती प्रियांका शेट्टी (दोघे रा. मेंगलोर) व मिथुल कन्नूभाई त्रिवेदी (रा. औध, जि. पुणे) यांनी ४० लाख रुपये घेऊन फसवणूक केल्याबद्दल शहर पोलिसांत गुन्हा दाखल करण्यात आला आहे. रमेश किवटे यांना सराफ व्यवसायासाठी एक कोटी रुपये कर्जाची गरज होती. किवटे यांचे कर सल्लागार सचिन देशपांडे यांनी बँकेकडून दीड कोटी रुपये कर्ज मिळवून देण्यासाठी बँक मॅनेजर असल्याचे सांगणाऱ्या अजय पवार नामक व्यक्तीस भेटविले. सचिन देशपांडे याच्यासह अन्य तिघांनी बँकेचे कर्ज मंजूर झाल्याचे खोटे एसएमएस मोबाइलवर पाठविले.

मार्च २०१८ ते जानेवारी २०२० या दोन वर्षांत कर्ज मंजुरीसाठी प्रोसेसिंग फी, डिपाॅझिट, तारण खर्च, असे ३९ लाख ८३ हजार रुपये किवटे यांनी देशपांडे, पवार, त्रिवेदी व पवार याची सेक्रेटरी प्रियांका यांच्या बँक खात्यावर भरले. मात्र, कर्ज देण्यास टाळाटाळ सुरू झाल्याने किवटे यांनी पोलिसांत फसवणुकीची फिर्याद दिली. याप्रकरणी पोलिसांनी महिन्यापूर्वी मिथुल कन्नूभाई त्रिवेदी या एका आरोपीला पुण्यातून अटक केली आहे. सहायक पोलीस निरीक्षक नितीन सावंत यांनी रविवारी सचिन देशपांडे यास अटक करून न्यायालयासमोर हजर केले. या प्रकरणातील अन्य दोघे अद्याप फरार असल्याचे पोलिसांनी सांगितले.