जगतापांमुळे जत तालुक्यात भाजप राष्ट्रवादीच्या दावणीला

जत : राज्यातील महाविकास आघाडीविरोधात भाजपचे प्रदेशाध्यक्ष चंद्रकांत पाटील व माजी मुख्यमंत्री देवेंद्र फडणीस यांनी परखड विरोधी भूमिका घेऊन दोन मंत्र्यांना राजीनामा देण्यास भाग पाडले आहे. परंतु जत तालुक्यात माजी आमदार विलासराव जगताप हे राष्ट्रवादीबरोबर युती करून पक्ष राष्ट्रवादीच्या दावणीला बांधण्याचे काम करीत आहेत. या संदर्भात पक्षनेतृत्वाकडे आपण तक्रार करणार आहोत, अशी माहिती भाजपचे नगरसेवक विजय ताड यांनी पत्रकार बैठकीत दिली.

ताड म्हणाले, स्वीकृत नगरसेवक उमेश सावंत यांचा वाळूतस्करीचा व वाळूचोरीचा व्यवसाय आहे. या संदर्भात जत व उमदी पोलिसांत गुन्हे दाखल आहेत. त्यांना पाठीशी घालण्याचे काम माजी आमदार विलासराव जगताप करीत आहेत. त्यामुळे तालुक्यात पक्ष बदनाम होत आहे. उमेश सावंत यांना स्वीकृत नगरसेवक पदावरून व मला विरोधी पक्ष नेतेपदावरून बदलण्याबाबत माजी आमदार विलासराव जगताप यांच्यासमोर निर्णय झाला होता. मला बदलण्यात आले; पण उमेश सावंत यांना का बदलण्यात आले नाही? यापाठीमागे नेमके काय कारस्थान आहे, ते समजून येत नाही.

उमेश सावंत यांच्या फार्महाऊसवर १५ दिवसांपूर्वी भाजप व राष्ट्रवादी काँग्रेसचे मोजके नगरसेवक आणि कार्यकर्त्यांची बैठक घेऊन जत तालुक्यात राष्ट्रवादी काँग्रेसबरोबर मिळून काम करावे, अशी सूचना माजी आमदार विलासराव जगताप यांनी सर्वांना केली होती. राष्ट्रवादी काँग्रेसचे माजी सभापती सुरेश शिंदे या बैठकीला उपस्थित होते. या संदर्भात पक्षनेतृत्वाकडे आपण तक्रार करणार आहाेत, असेही विजय ताड म्हणाले.

विरोधी पक्षनेता म्हणून जत नगरपालिकेतील स्मशानभूमीचा प्रश्न, तिरडी मोर्चा, पाणीप्रश्न, नगरपालिका प्रशासनाला विकासकामांच्या संदर्भात जाब विचारून टाळे ठोकण्यात आले. मी प्रखर विरोधी भूमिका मांडली आहे. प्रशासनाला वेळोवेळी धारेवर धरून मासिक बैठकीत विकासकामे मंजूर करून घेतली. तरीही मला त्या पदावरून बदलण्यात आले. विरोधी पक्षनेतेपद बदलण्यासाठी केवळ दोनच नगरसेवक उपस्थित असताना कागदाेपत्री बैठक दाखवून इतर नगरसेवकांच्या घरी जाऊन त्यांच्या सह्या घेण्यात आल्याचा आराेपही त्यांनी यावेळी केला. नगरसेवक प्रकाश माने, श्रीदेवी सगरे व स्वीकृत नगरसेवक उमेश सावंत यांच्याविरोधात न्यायालयात अब्रुनुकसानीचा दावा दाखल करणार आहे, असेही विजय ताड म्हणाले.