अन्न व औषध प्रशासनातर्फे डाॅ. महेश जाधव याच्यावर स्वतंत्र कारवाई

मिरजेतील अपेक्स रुग्णालयात ८७ कोविड रुग्णांच्या मृत्यूप्रकरणी रुग्णालय चालक डाॅ. महेश जाधव, त्याचा भाऊ न्यूरो सर्जन डॉ. मदन जाधव यांच्याविरुद्ध सदोष मनुष्यवधाचा गुन्हा दाखल करुन पोलिसांनी डाॅ. जाधव बंधूंसह रुग्णालयातील कर्मचारी व तीन रुग्णवाहिका चालकासह १३ जणांना अटक केली आहे. डाॅ. जाधव याने महागडी वाहने व मिरजेत मालमत्ता खरेदीसाठी कोट्यवधी रुपयांचे व्यवहार केले असल्याने पोलिसांनी डाॅ. जाधव याच्या आर्थिक व्यवहारांची चाैकशी सुरु केली आहे.

मिरजेतील अपेक्स रुग्णालय प्रकरणात आणखी काही डाॅक्टरांवर अटकेची टांगती तलवार असल्याने वैद्यकीय क्षेत्रात खळबळ उडाली आहे. मिरजेत दुचाकी शोरुम भाड्याने घेऊन कोविड रुग्णालय चालविणाऱ्या डाॅ. महेश जाधव यास काही डाॅक्टरांनी मदत केल्याचे निष्पन्न झाल्याने पोलिसांनी संबंधित डाॅक्टरांना चाैकशीसाठी पाचारण केले आहे. चाैकशीस हजर राहण्याची नोटीस बजावल्यानंतर सांगलीतील एका छातीरोग तज्ज्ञाने अटकपूर्व जामिनासाठी न्यायालयात धाव घेतली आहे. जामीन अर्जावर सोमवारी सत्र न्यायालयात सुनावणी होणार असून पोलिसांनी जामीन अर्जास विरोध केला आहे. डाॅ. जाधव यास मदत करणाऱ्या आणखी काही जणांवर पोलिसांच्या कारवाईची टांगती तलवार असल्याने वैद्यकीय क्षेत्रात खळबळ उडाली आहे.

अ‍पेक्स कोविड रुग्णालयावर एक आठवड्यापूर्वी अन्न व औषध विभागाच्या पथकाने छापा टाकून साडेचार लाखांचा औषधसाठा जप्त केला आहे. रुग्णालयास औषध विक्रीचा परवाना नसतानाही डाॅ. जाधव याने खासगी दुकानाच्या नावावर औषध विक्री केल्याचे निष्पन्न झाल्याने डाॅ. महेश जाधव याच्याविरुद्ध अन्न व औषध प्रशासनातर्फे स्वतंत्र खटला दाखल करण्याची तयारी सुरु आहे.