आटपाडीत कोतवालास कोंडून वाळूचा डंपर पळवला

आटपाडी : वाळूतस्करावर कारवाई करून पकडून आणलेला वाळूचा ट्रक चोरट्यांनी राखणदार कोतवालास मारहाण करत खोलीत कोंडून पळवला. ही घटना आटपाडी तहसील कार्यालय आवारात घडली. याबाबत आटपाडी पोलिसांत गुन्हा नोंद करण्यात आला आहे.

आटपाडी तालुक्यातील अवैध वाळूतस्करांवर मोठ्या प्रमाणात कारवाई सुरू आहे. १४ सप्टेंबर रोजी विनानंबर प्लेट असलेला वाळू वाहतुकीचा ट्रक वाळूविरोधी पथकाने पकडून आणाला होता. तो आटपाडी तहसील कार्यालय शेजारी असणाऱ्या धान्य गोदाम परिसरात लावण्यात आला होता.

गुरुवार, दि. १६ सप्टेंबर रोजी रात्री दीड वाजण्याच्या सुमारास गोदामाच्या गेटचे कुलूप तोडत तोंडाला बुरखा बांधून आलेल्या तीन जणांनी आत प्रवेश केला. पहारा देत बसलेले संजय माने यांना लाथाबुक्क्यांनी मारहाण करत गोडावून रूममध्ये कोंडून ठेवत बाहेरून कडी लावली.

यावेळी चोरट्याने पांढऱ्या रंगाचा असणारा टेम्पोवजा डंपर वाळूसह पळवून नेला. यानंतर संजय माने यांनी आटपाडी पोलिसांशी संपर्क केला असता घटनास्थळी येऊन माने यांची पोलिसांनी सुटका केली. याबाबत संजय माने यांनी आटपाडी पोलिसांत तक्रार दिली आहे.

चाैकट

एकाच महिन्यातील दुसरी घटना

वाळूविरोधी पथकाकडून जोखीम घेत वाळू वाहतूक करणारे वाहन पकडून आणत ते तहसील कार्यालय परिसर व धान्य गोदाम परिसरात लावले जाते. पण, ही पकडून आणलेली वाहने चोरीस जाण्याची ही महिन्यातील दुसरी घटना आहे. वाळूसह वाहन चोरीला जाण्याने आश्चर्य व्यक्त केले जात आहे.

चाैकट

महसूल विभागाचे अपयश की सहकार्य ?

दरम्यान, महसूल विभागाने कारवाई करत वाळूसह वाहनांचा पंचनामा केलेले वाहन महसूल विभागाच्या दारातूनच चोरून नेले जाते. हे महसूल विभागाचे अपयश आहे की महसूल विभागातील काहींच्या सहकार्यनेच या घटना घडल्या आहेत. याबाबत तालुक्यात उलटसुलट चर्चा आहे.