आटपाडीत सफरचंदाचे लिलाव सुरू

आटपाडी : हिमाचल प्रदेशातील सफरचंद स्वातंत्र्यदिनी आटपाडीत दाखल झाली. माजी आमदार राजेंद्र अण्णा देशमुख आणि आमदार गोपीचंद पडळकर यांच्या हस्ते सौद्याचे उद्घाटन करण्यात आले.

येथील बाजार समितीच्या आवारात डाळिंबाचे सौदे होतात. संचालक पंढरीनाथ नागणे यांच्या प्रयत्नातून मागील दोन वर्षांपूर्वी चालू केलेल्या सफरचंद सौद्याला उत्स्फूर्त प्रतिसाद मिळत आहे. सध्या हिमाचल प्रदेशमधील सिमला येथील सफरचंद उपलब्ध आहेत. मंगलमूर्ती फळबाग संघाच्या वतीने सफरचंदाच्या सौद्याचे आयोजन केले होते.

यावेळी पंचायत समिती माजी सभापती हर्षवर्धन देशमुख, कृषी उत्पन्न बाजार समितीचे सभापती भाऊसाहेब गायकवाड, आटपाडीचे उपसरपंच अंकुश कोळेकर, प्राथमिक शिक्षक बँकेचे अध्यक्ष उत्तम जाधव, शशिकांत जाधव, नारायण ऐवळे, डी. टी. पाटील उपस्थित होते.

चौकट

बागेतून थेट आटपाडीत

हिमाचल प्रदेश, काश्मीरमधून सफरचंदाच्या बागेतून थेट आटपाडी बाजार समितीत सफरचंद येत असल्याने या परिसरात ताजी सफरचंद उपलब्ध होत आहेत. त्यामुळे सांगली, सातारा, सोलापूर जिल्ह्यातील किरकोळ व्यापारी आणि नागरिकही गर्दी करत आहेत. सध्या २८ ते ३० किलो सफरचंदाच्या पेटीचा प्रतवारीनुसार अडीच ते तीन हजार रुपये दर आहे.