जिल्ह्यात २५ हजार बांधकाम कामगारांना मदत; अडीच हजार अर्जांमध्ये त्रुटी

सांगली : लॉकडाऊनमध्ये रोजगार हिरावल्याने राज्य शासनाने बांधकाम कामगारांना दोन टप्प्यांत पाच हजार रुपयांची मदत जाहीर केली होती. सांगली जिल्ह्यात सध्या ८० हजार नोंदणीकृत कामगार असून आजअखेर २५ हजार १८९ कामगारांना मदत मिळाली आहे. अडीच हजार अर्जांत त्रुटी आढळल्याने त्या दूर करून पुन्हा प्रस्ताव पाठविण्यात येत आहेत.

नोंदीत सक्रिय बांधकाम कामगारांना पहिल्या टप्प्यात दोन हजार व दुसऱ्या टप्प्यात ३ हजार रुपये एवढे आर्थिक साहाय्य थेट बांधकाम कामगाराच्या बँक खात्यात डीबीटी पद्धतीने जमा करण्याचा निर्णय घेण्यात आला होता. त्यानुसार सांगली जिल्ह्यातील नोंदीत सक्रिय २५ हजार १८९ बांधकाम कामगारांना मदत देण्यात आली आहे. अजूनही ही प्रक्रिया सुरू आहे. अडीच हजार कामगारांच्या अर्जात त्रुटी आढळल्या होत्या, त्या दुरुस्त करण्याचे काम सध्या सुरू आहे. बांधकाम कामगारांना या योजनेतून दिलासा मिळाला आहे. सक्रिय व हयात कामगारांना याचा लाभ देण्यात येत आहे. ही सर्व प्रक्रिया ऑनलाइन असून तांत्रिक अडचणी नसल्याने हे प्रस्ताव गतीने मंजूर होत आहेत.

आकडेवारी

जिल्ह्यातील एकूण बांधकाम कामगारांची संख्या

८०,०००

लाभ मिळालेल्या एकूण कामगारांची संख्या

२५,१८९

त्रुटी असल्याने लाभाच्या प्रतीक्षेत असलेले कामगार

२,५००

अर्जांमध्ये काय त्रुटी आहेत

अनेक कामगारांनी हयातीचे दाखले जोडलेले नाहीत.

अनेकांच्या आधार कार्डची माहिती नाही

बँक खाते क्रमांकाबाबत माहिती व्यवस्थित नाही

काही ठिकाणी वेगवेगळ्या कागदपत्रांमध्ये नावामध्ये फरक दिसून येतो. त्याची दुरुस्ती झाली नाही

कोट

बांधकाम कामगारांना कोरोना काळातील मदत तातडीने मिळत आहे. प्रस्ताव पाठविण्याची प्रक्रिया अद्याप सुरू असून खऱ्या लाभार्थ्यांना त्याचा लाभ देण्याचा आमचा प्रयत्न आहे.

-अनिल गुरव, सहायक कामगार आयुक्त, सांगली

कोट

शासनाने जाहीर केल्याप्रमाणे आम्हाला मदतनिधी मिळाला. लाॅकडाऊनमुळे रोजगार ठप्प होता. गरिबीचे चटके सोसत असताना मिळालेली ही मदत दिलासा देणारी ठरली.

-चंद्रकांत इंगळे, बहादूरवाडी (ता. वाळवा)

कोट

अजूनही आम्ही कोरोनामुळे, महागाईमुळे अडचणीत आहोत. आर्थिक स्थिती चांगली नाही. अशा काळात शासनाने आम्हाला मदत दिली. त्याचा लाभ मिळाला.

- बाळासाहेब सुतार, वशी (ता. वाळवा)