गावठी पिस्तूल घेऊन फिरणाऱ्यास अटक

लोकमत न्यूज नेटवर्क

सांगली : सावळी (ता.मिरज) येथे गावठी बनावटीचे पिस्तूल घेऊन फिरणाऱ्या तरुणास स्थानिक गुन्हे अन्वेेषण शाखेच्या पथकाने अटक केली. विनोद चंदू कांबळे (वय २८, रा. मेंढगिरी, ता. जत) असे संशयिताचे नाव असून, त्याच्याकडून ५० हजार रुपये किमतीचे पिस्तूल जप्त करण्यात आले आहे.

कोरोनाच्या वाढत्या संसर्गामुळे अवैधपणे शस्त्र बाळगणाऱ्यांवर कडक कारवाईचे आदेश पोलीस अधीक्षक दीक्षित गेडाम यांनी दिले आहेत. त्यानुसार एलसीबीचे पथक गस्तीवर असताना, त्यांना सावळी येथील बसस्थानकाजवळ तरुण पिस्तूल घेऊन थांबल्याची माहिती मिळाली होती. त्यानुसार पथकाने सापळा लावून त्यास ताब्यात घेतले. त्याची अंगझडती घेतली असता, त्याच्याजवळ गावठी बनावटीचे पिस्तूल आणि २५० रुपये रोख मिळून आले. त्याच्याकडे असलेल्या पिस्तुलाबाबत त्याने कोणतेही समाधानकारक उत्तर दिले नाही. त्यामुळे त्याला कुपवाड एमआयडीसी पोलिसांच्या ताब्यात देण्यात आले आहे.

पोलीस निरीक्षक सर्जेराव गायकवाड यांच्या मार्गदर्शनाखाली उपनिरीक्षक दिलीप ढेरे, जितेंद्र जाधव, संदीप गुरव, सागर टिंगरे, अनिल कोळेकर यांच्या पथकाने ही कारवाई केली.