इस्लामपुरातील तीन रुग्णालयात ७५ ऑक्सिजन बेडची व्यवस्था

इस्लामपूर : शहरासह लगतच्या गावातील कोरोना संसर्गाचा वाढता प्रादुर्भाव रोखतानाच नव्याने सापडणाऱ्या कोरोनाबाधित रुग्णांना तातडीचे उपचार मिळावेत, यासाठी जिल्हाधिकाऱ्यांनी शहरातील आणखी तीन रुग्णालये कोरोना उपचारासाठी अधिगृहित केल्याची माहिती तालुका आरोग्याधिकारी डॉ. साकेत पाटील यांनी दिली.

दत्त टेकडी परिसरातील समाजकल्याण विभागाच्या इमारत परिसरात सहारा कोविड सेंटरमध्ये एकूण ३० ऑक्सिजन बेड उपलब्ध करण्यात आले असून त्यातील ५ बेड अतिदक्षता विभागासाठी राखीव असतील. कामेरी रस्त्यावरील श्री हॉस्पिटलमध्ये १० ऑक्सिजन बेड आणि ५ बेड अतिदक्षता विभागासाठी तर सत्रे-देशमुख रुग्णालयात ३० बेड असून त्यातील १५ बेड ऑक्सिजनचे आणि ६ बेडचा अतिदक्षता विभाग असणार आहे.

डॉ. पाटील म्हणाले, ७५ बेडची नव्याने व्यवस्था झाल्याने कोरोनाबाधित रुग्णांवर तातडीने उपचार करण्याची सुविधा निर्माण झाली आहे. यापूर्वी तालुक्यामध्ये ५१६ बेडची व्यवस्था करण्यात आली होती. शहरातील मुस्लिम समाजाच्यावतीने सुरू करण्यात आलेल्या कोविड उपचार केंद्रात ७० बेड आहेत. या सर्व ठिकाणी कोविड रुग्णांना गतीने उपचार मिळण्याची व्यवस्था करण्यात आली आहे.