इस्लामपुरात स्वच्छ सर्वेक्षण मोहिमेची ऐशीतैशी

लोकमत न्यूज नेटवर्क

इस्लामपूर : शहरात नगरपालिकेने बसस्थानक आवारासह काही चौकात स्वच्छ सर्वेक्षणाचे फलक लावले आहेत. मात्र स्वच्छतेची ऐशीतैशी आहे. बसस्थानकात स्वच्छतेचा संदेश देणाऱ्या फलकाखालीच कचऱ्याचा ढीग आहे. तेथे डुकरे वावरतात. अशा अस्वच्छ वातावरणात डासांचा प्रादुर्भाव वाढला आहे.

नगरपालिकेने स्वच्छता मोहिमेत भाग घेतला आहे. यामध्ये कचऱ्याचे विलगीकरण, प्लास्टिकमुक्त शहर, स्वछ आणि सुविधापूर्ण सार्वजनिक शौचालय, हागणदारीमुक्त शहर आदी घोषणा असल्या तरी त्या फक्त कागदावरच आहेत. ठिकठिकाणी कचरा टाकला जातो. गटारी तुंबल्या आहेत. बसस्थानक आवारात कित्येक दिवसांपासून कचऱ्याचे ढीग असून, गाजर गवत, झुडपे वाढली आहेत. यावर ‘लोकमत’ने वेळोवेळी आवाज उठवला आहे. परंतु येथील अधिकारी दुर्लक्ष करीत आहेत.

बसस्थानकाच्या डाव्या बाजूस पालिकेने स्वच्छता सर्वेक्षणाचा फलक लावला आहे. या फलकावरील घोषणांना बसस्थानकातील अधिकाऱ्यांनी तिलांजली दिली आहे. बसस्थानकाच्या संरक्षण भिंतीपलीकडील दुकानदार, रुग्णालये, निवासी नागरिक बसस्थानक आवारातील स्वच्छता सर्वेक्षणाच्या फलकाखालीच कचरा टाकतात. याकडे पालिका आरोग्य अधिकारी आणि स्थानक प्रमुख दुर्लक्ष करीत घोषणेला हरताळ फासत आहेत.

सध्या इस्लामपुरात मोकाट कुत्र्यांनी उच्छाद मांडला आहे. त्याचबरोबर शहरात डुकरांचाही वावर आहे. त्यामुळे येथे नेहमीच अस्वछता असते. यापूर्वी पालिकेने डुकराचा बंदोबस्त केला होता. आता पुन्हा ती शहरात दिसू लागली आहेत. त्यामुळे स्वछ सर्वेक्षणाचा फज्जा उडाला आहे.

चौकट

खड्डे देणार आजारांना निमंत्रण

बसस्थानकात ठिकठिकाणी खड्डे आहेत. पावसाळ्यात काही ठिकाणी पाणी साचते. या परिसरात असलेल्या पाण्याच्या डबक्यांमुळे डासांची मोठ्या प्रमाणात उत्पत्ती होते. त्यामुळे डेंग्यू, चिकुनगुनियासारख्या रोगाचा फैलाव होऊ शकतो.