जिल्ह्यात बेकायदेशीर दारू, जुगार अड्ड्यांवर धडक कारवाई

सांगली : जिल्ह्यातील विविध भागात सुरू असलेल्या बेकायदेशीर दारू विक्री व जुगार अड्ड्यांवर स्थानिक गुन्हे अन्वेषण शाखेच्या पथकाने एकाचवेळी धडक कारवाई करत अवैध व्यावसायिकांना अटक केली आहे. पोलीस अधीक्षक दीक्षित गेडाम यांनी दिलेल्या आदेशानुसार झालेल्या या कारवाईत दारू व जुगारप्रकरणी ३५ जणांना अटक करत त्यांच्याकडून तीन लाख ८२ हजार १९७ रुपयांचा मुद्देमाल जप्त करण्यात आला. एलसीबीच्या पथकाने एकाचवेळी केलेल्या धडक कारवाईचे कौतुक होत आहे.

पोलीस अधीक्षक दीक्षित गेडाम यांनी जिल्ह्यात सुरू असलेल्या अवैध व्यवसायावर कडक कारवाईचे आदेश दिले होते. त्यानुसार एलसीबीचे निरीक्षक सर्जेराव गायकवाड यांनी प्रत्येक विभागात वेगवेगळी टिम करून अवैध धंद्यांवर कारवाईचे नियोजन केले. एलसीबीने सुरू केलेल्या या धडक कारवाईने अवैध धंदेवाल्यांचे अक्षरश: कंबरडे मोडले आहे.

एलसीबीने केलेल्या कारवाईत अवैधरित्या दारू विक्री करणाऱ्यांवर १९ गुन्हे दाखल करत त्यांच्याकडून ६७८ दारु बाटल्या, ५७ लीटर गावठी दारू, कच्चे रसायन ११२५ लीटर असा ९२ हजार ७१५ रुपयांचा मुद्देमाल जप्त करण्यात आला.

अवैधपणे सुरू असलेल्या जुगार अड्ड्यावर कारवाई करताना १६ जणांना अटक करण्यात आली असून त्यात जुगार साहि्त्य, मोबाईल असा दोन लाख ८९ हजार ४८२ रुपयांचा मुद्देमाल जप्त करण्यात आला. मिरज शहरात अमली पदार्थांचे सेवन करणाऱ्या ५ जणांना अटक करण्यात आली.