जिल्ह्यात ३५ टक्के पाणीसाठा

सांगली : जिल्ह्यात मोठे पाच आणि छोटे ७९ असे ८४ पाझर तलाव असून, त्यामध्ये सध्या २७४० दशलक्ष घनफूट म्हणजे ३५ टक्के पाणीसाठा आहे. गतवर्षीच्या तुलनेत यंदा दोन टक्के जादा साठा शिल्लक आहे. आठ तलाव कोरडे पडण्याच्या मार्गवर आहेत. जत, आटपाडी, कवठेमहांकाळ या दुष्काळी तालुक्यांतील १७ तलावांमध्ये ५० टक्क्यांपेक्षा जास्त पाणीसाठा आहे. यामुळे एप्रिलच्या दुसऱ्या आठवड्यातही पाण्यासाठी टँकर सुरू नाहीत.

जिल्ह्यातील तासगाव तालुक्यातील सिद्धेवाडी, कवठेमहांकाळ तालुक्यातील बसाप्पाचीवाडी, जत तालुक्यातील संख, दोड्डनाला आणि शिराळा तालुक्यातील मोरणा या पाच मोठ्या तलावांमध्ये १७६० दशलक्ष घनफूट पाणी साठवण्याची क्षमता आहे. या तलावांमध्ये सध्या ७४४ दशलक्ष घनफूट म्हणजे ४४ टक्के पाणीसाठा शिल्लक आहे. गेल्यावर्षी २८ टक्केच पाणीसाठा शिल्लक होता. गतवर्षीच्या तुलनेत १६ टक्के जादा पाणीसाठा शिल्लक असल्यामुळे पाणीटंचाईचे संकट टळले आहे. छोटे ७९ पाझर तलावांची ६०९३ दशलक्ष घनफूट पाणीसाठ्याची क्षमता आहे. त्यापैकी सध्या १९९६ दशलक्ष घनफूट पाणीसाठा शिल्लक आहे. ३३ टक्के पाणीसाठा शिल्लक असून गतवर्षीच्या तुलनेत एक टक्का कमी पाणीसाठा आहे. गेल्यावर्षी याच तारखेला ३४ टक्के पाणीसाठा शिल्लक होता. दि. ९ एप्रिलपर्यंत जिल्ह्यात ३५ टक्के पाणीसाठा शिल्लक असून तो मान्सूनच्या पावसापर्यंत टिकणे गरजेचे आहे. तासगाव तालुक्यात सात तलाव असून एका तलावात ५० टक्के, सहा तलावांमध्ये २५ ते ५० टक्के, खानापूर तालुक्यातील चार तलावांमध्ये ५० टक्क्यापेक्षा जास्त, तर चार तलावांमध्ये २५ टक्के पाणीसाठा शिल्लक आहे. वाळवा तालुक्यात दोन तलाव असून त्यामध्ये केवळ २५ टक्केच पाणीसाठा आहे.

चौकट

टेंभू, ताकारी, म्हैसाळ योजनांचा दिलासा

जत, आटपाडी, कवठेमहांकाळ, खानापूर दुष्काळी तालुक्यांतील तलावांमध्ये ५० टक्क्यापेक्षा जास्त पाणीसाठा शिल्लक आहे. तो टेंभू, ताकारी, म्हैसाळ योजनांमधून तलाव भरल्यामुळे दिसत आहे. तलावांमधील पाणीसाठ्यामुळे पिण्याच्या पाण्यासह शेतीच्या पाण्याचा प्रश्न सुटल्याचे दिसत आहे.

चौकट

जिल्ह्यातील तलावांतील पाणीसाठा

तालुका तलाव संख्या पाणीसाठी टक्के

तासगाव ७ ४३

खानापूर ८ ३१

कडेगाव ७ ४१

शिराळा ५ २७

आटपाडी १३ ४४

जत २८ २९

क.महांकाळ ११ ४६

मिरज ३ २८

वाळवा २ १५

एकूण ८४ ३५