शिरसगावात कोरोनाचे १०७ रुग्ण

लोकमत न्यूज नेटवर्क

कडेगाव : शिरसगाव (ता. कडेगाव) येथे कोरोनाचा कहर सुरू आहे. १८०० लोकवस्तीच्या आणि ३८० कुटुंबे असलेल्या या गावात गेल्या काही दिवसांत १०७ रुग्ण आढळून आले आहेत. त्यामुळे आरोग्य विभागाला येथे युद्धपातळीवर चाचण्या कराव्या लागत आहेत. गावातील चार कोरोना रुग्णांचा मृत्यू झाला आहे.

या गावातील सर्दी, खोकल्याची लक्षणे असलेल्या काही संशयितांनी निष्काळजीपणा केला. रुग्णालयात

लवकर उपचार घेतले नाहीत. त्याचा अनेकांना फटका बसला. गावात बुधवारी एकाच दिवशी कोरोनाचे १२ रुग्ण आढळून आले. प्रांताधिकारी डॉ. गणेश मरकड व तहसीलदार डॉ. शैलजा पाटील यांनी गावास भेट देऊन सरपंच सुप्रिया मांडके व ग्रामपंचायत सदस्यांच्या उपस्थितीत दक्षता समितीची बैठकही घेतली. येथे प्रशासनाने कोरोना नियंत्रणासाठी अधिक लक्ष केंद्रित केले आहे. चिंचणी ग्रामीण रुग्णालयाच्या वैद्यकीय अधिकारी डॉ. पौर्णिमा शृंगारपुरे व मोहित्यांचे वडगाव आरोग्य केंद्राचे डॉ. सागर जाधव, डॉ. प्रवीण माळी यांनी येथील २७५ लोकांच्या कोरोना चाचण्या घेतल्या आहेत. परिचारिका स्नेहा सूर्यवंशी, आशा स्वयंसेविका नीता धर्माधिकारी आणि तेजस्विनी पवार रुग्णांच्या संपर्कातील लोकांची माहिती घेत आहेत. कोरोना रुग्णांना चिंचणी व कडेगाव येथील ग्रामीण रुग्णालयात सुरू झालेल्या कोविड हेल्थ सेंटरमध्ये उपचारासाठी पाठविले जात आहे. सौम्य लक्षणाच्या रुग्णांना चिंचणी येथील शासकीय वसतिगृहात सुरू झालेल्या कोविड केअर सेंटरमध्ये किंवा गृह विलगीकरण कक्षात पाठविले जात आहे.

चौकट

माजी सरपंचांकडून दिलासा

शिरसगावचे माजी सरपंच सतीश मांडके संशयित कोरोना रुग्णांना रुग्णालयात पाठविण्याची व्यवस्था करीत आहेत. अत्यवस्थ रुग्णांना बेड उपलब्ध करून घेऊन रुग्णवाहिकेबरोबर स्वतःच्या गाडीने कऱ्हाड व सांगली येथे जाऊन रुग्णांना व नातेवाईक यांना दिलासा देत आहेत.