रत्नागिरीत १० हजाराच्या गांजासह तरुण ताब्यात

रत्नागिरी : शहरातील झाडगाव - परटवणे रोड दरम्यान शहर पोलिसांनी टाकलेल्या धाडीत १० हजार रुपयांचा गांजा हस्तगत करण्यात आला. ही कारवाई बुधवारी सायंकाळी ५ वाजण्याच्या सुमारास शहर पोलिसांनी केली. या कारवाईत प्राैढाला ताब्यात घेतले असून, रात्री उशिरापर्यंत गुन्हा दाखल करण्याची कार्यवाही सुरु होती.

शहरातील झाडगाव - परटवणे रोड दरम्यान नदीकिनारी एक तरुण गांजा विक्री करत असल्याची माहिती शहर पोलीस निरीक्षक अनिल लाड यांना मिळाली होती. या माहितीवरून या परिसरात पोलिसांनी पाळत ठेवली होती. या मिळालेल्या माहितीची खात्री झाल्यानंतर पोलिसांनी कारवाईचा निर्णय घेऊन झाडगाव-परटवणे परिसरात सापळा रचला होता. शहर पोलिसांचे एक पथक साध्या वेशात या परिसरात तैनात होते.

गांजा विक्री होत असलेल्या ठिकाणी पोलिसांनी छापा टाकला असता, गांज्याच्या ५ पुड्या एका प्रौढाकडे सापडल्या. या गांज्याची किंमत १० हजार १२० रुपये असून, पोलिसांनी गणेश पांडुरंग वाडेकर (४०, रा. शिवाजी हायस्कूलजवळ) याला ताब्यात घेतले आहे. त्याच्यावर गुन्हा दाखल करण्याची कार्यवाही रात्री उशिरापर्यंत सुरु होती.

दरम्यान, ही कारवाई शहर पोलीस निरीक्षक अनिल लाड यांच्या मार्गदर्शनाखाली अंमलदार गणेश सावंत व रत्नकांत शिंदे यांनी केली. या कारवाईमुळे परिसरात खळबळ उडाली असून, आपल्या परिसरात गांजा विक्री होत असल्याचे उघडकीस आल्याने येथील रहिवासी चांगलेच धास्तावले आहेत.