रत्नागिरी : तालुक्यातील गणेशगुळे समुद्रकिनारी अज्ञाताचा मृतदेह कुजलेल्या अवस्थेत सापडला. याप्रकरणी पूर्णगड पोलीस ठाण्यात आकस्मिक मृत्यूची नोंद करण्यात आली आहे. ही घटना गुरुवारी (दि.२२ एप्रिल) सकाळी आठ वाजण्याच्या सुमारास उघडकीस आली.
याबाबत गणेशगुळेचे पोलीस पाटील संतोष जनार्दन लाड यांनी पूर्णगड पोलिसांना माहिती दिली. त्यानुसार गुरुवारी सकाळी तेथील ग्रामस्थांना गणेशगुळे समुद्रकिनारी कुजलेल्या अवस्थेत एक मृतदेह आढळला. त्यांनी याची माहिती पोलीस पाटील लाड यांना देताच त्यांनी मृतदेहाची पाहणी केली; परंतु मृतदेह कुजल्यामुळे त्याची ओळख पटविणे शक्य नव्हते. याबाबत पूर्णगड पोलिसांना माहिती मिळताच त्यांनी तातडीने घटनास्थळी धाव घेत मृतदेहाचा पंचनामा करून उत्तरीय तपासणीसाठी जिल्हा शासकीय रुग्णालयात पाठविला. याबाबत अधिक तपास पोलीस हेड काॅन्स्टेबल धातकर करीत आहेत.