चिपळूण - कऱ्हाड मार्गावरील खड्ड्यांमुळे वाहतूक काेंडी

चिपळूण : येथील बहादूरशेख नाक्यावरील चौकात चिपळूण - कऱ्हाड मार्गावर पाईपलाईनसाठी खोदून ठेवलेला खड्डा गेले दोन महिने जैसे थे परिस्थितीत असल्याने येथे प्रचंड वाहतूक कोंडी होत आहे. एखादा मोठा अपघातही होण्याची शक्यता आहे.

शहरातील पाण्याच्या पाईपलाईनसाठी महामार्ग विभागाने हा खड्डा खोदून ठेवला असल्याने नगर परिषदेचाही नाईलाज झाला आहे. मुंबई - गोवा महामार्ग चौपदरीकरणाचे काम सुरू असून, बहादूरशेख ते शिवाजीनगर या उड्डाणपुलाचे कामही युद्धपातळीवर सुरू ठेवण्यात आले आहे. त्यासाठी शहरातील पाण्याच्या पाईपलाईनचे काम अगोदर करणे आवश्यक असल्याने ते कामही हाती घेण्यात आले आहे. परंतु, राष्ट्रीय महामार्ग प्राधिकरण आणि संबंधित ठेकेदार यांच्यामध्ये या विषयात समन्वय नसल्याने शहरातील नागरिक तसेच वाहनचालकांना त्याचा प्रचंड त्रास सहन करावा लागत आहे.

शहरातील पाणी पुरवठ्याचे तर तीनतेरा वाजलेच आहेत. पण बहादूरशेख नाका येथे चिपळूण - कऱ्हाड मार्गावर महत्त्वाच्या चौकात भला मोठा खड्डा खोदून ठेवण्यात आला आहे. मुख्य रस्त्यावरच हा खड्डा असल्याने महामार्गावरील एका बाजूची वाहतूक बंद पडली आहे. त्यामुळे साहजिकच येथे वाहतूक कोंडी होऊन चौकात अपघात होण्याची शक्यता वाढली आहे. या खड्ड्यामुळे येथील रिक्षा स्टॅण्डही हलविण्यात आल्याने वाहतुकीला अधिक अडथळा निर्माण झाला आहे. येथे अपघात झाल्यास त्याला महामार्ग विभागच जबाबदार असेल, असा स्पष्ट इशारा नगरसेवक अविनाश केळस्कर यांनी दिला आहे.