पथदीप बंद

देवरुख : संगमेश्वर तालुक्यातील बहुसंख्य ग्रामपंचायतींच्या कार्यक्षेत्रातील पथदीप सध्या बंद आहेत. वीजबिलाची रक्कम वेळेवर न भरल्याने पथदीप बंद करण्यात आल्याचे महावितरणकडून या ग्रामपंचायतींना कळविण्यात आले आहे. ग्रामपंचायतीने अद्याप बिले न भरल्याने पथदीप बंदच आहेत.

जीर्ण वृक्ष तोडावेत

शिरगाव : कऱ्हाड - चिपळूण मार्गावरील पोफळी सय्यदवाडी येथील अब्बास सय्यद यांच्या घरासमोर सुकलेले जीर्ण झाड धोकादायक बनले आहे. हे झाड पडल्यास दुर्घटना होण्याचा धोका व्यक्त होत आहे. त्यामुळे सार्वजनिक बांधकाम विभागाने हे झाड तोडावे, अशी मागणी नागरिकांकडून करण्यात येत आहे.

कोविड सेंटरला देणगी

साखरपा : येथील महात्मा गांधी हायस्कूलमध्ये १९८९-९० या शैक्षणिक वर्षात शिकत असलेल्या माजी विद्यार्थ्यांनी इथल्या कोविड केअर सेंटरला ३० हजार रुपयांची मदत केली. माजी विद्यार्थी तथा देवरुख पंचायत समितीचे सभापती जया माने यांच्याकडून जिल्हा परिषद अध्यक्ष विक्रांत जाधव यांच्याकडे ही देणगी सुपूर्द करण्यात आली.

कोरोना चाचणीला विलंब

रत्नागिरी : जिल्हा आरोग्य विभागाने कोरोना चाचण्यांची संख्या वाढवली आहे. परंतु, या चाचण्यांचे अहवाल मिळण्यासाठी विलंब होत आहे. या चाचण्या करणारे अहवाल येईपर्यंत घरात थांबून न राहता इतरत्र फिरत राहतात. त्यामुळे त्यांच्याकडून कोरोनाचा संसर्ग सर्वत्र फैलावत आहे. त्यामुळे कोरोना रुग्णांची संख्या अधिक वाढत आहे.

भात लावणीला वेग

सावर्डे : चिपळूण तालुक्यात शेतीची कामे आता वेगात होऊ लागली आहेत. योग्यवेळी पेरणी केल्याने रोपांची योग्य वाढ झाली आहे. त्यामुळे भात लावणीच्या कामासाठी शेतकऱ्यांची लगबग सुरु झाली आहे. सुरुवातीचा पाऊस चांगला झाल्याने ८ ते १० दिवसातच रोपे तरारुन आली असून, लावणी उरकण्यासाठी शेतकरी घाई करत आहेत.

फणस कलमांचे वाटप

चिपळूण : तालुक्यातील निर्मल ग्रामपंचायत, कळंबस्ते येथे कृषी दिनाचे औचित्य साधून ग्रामपंचायत इमारत परिसरात लागवड करण्यात आली. यावेळी नारळ तसेच फणस कलमांचे वाटप शेतकरी कुटुंबांना करण्यात आले. कार्यक्रमाला माजी सभापती शौकत मुकादम, सरपंच विकास गमरे तसेच कृषी विभागातील कर्मचारी उपस्थित होते.

औषधी वनस्पतींची लागवड

राजापूर : तालुक्यातील रायपाटण येथील मनोहर हरी खापणे महाविद्यालयाच्या राष्ट्रीय सेवा योजना विभागातर्फे औषधी वनस्पतींची लागवड करण्यात आली. औषधी वनस्पतीची विद्यार्थ्यांना ओळख व्हावी तसेच मानवी जीवनातील त्यांचे महत्त्व लक्षात यावे, या हेतूने दरवर्षी औषधी वनस्पतींची लागवड केली जाते.

उद्यानात शुकशुकाट

रत्नागिरी : गेल्या दीड वर्षापासून लॉकडाऊनमुळे सर्व व्यवसाय, उद्योग तसेच सार्वजनिक ठिकाणेही बंद आहेत. मुलांची रमण्याची ठिकाणे असलेली उद्यानेही पुन्हा बंद आहेत. त्यामुळे बालकांअभावी ही उद्याने सुनसान झाली आहेत. अनेक दिवस बंदस्थितीत राहिल्याने या उद्यानातील खेळण्यांचीही दुरवस्था झाली आहे.

छोट्या मूर्तींना मागणी

लांजा : शासनाने कोरोनाच्या अनुषंगाने गणेशोत्सवासाठी नियमावली घालून दिली आहे. त्यानुसार यावर्षीही छोट्या मूर्तींना प्राधान्य दिले जाणार आहे. त्यामुळे यावर्षीही तालुक्यात छोट्या गणेशमूर्तींना अधिक मागणी असल्याचे दिसून येत आहे. मूर्तीशाळांमध्ये आता कलाकारांची लगबग सुरु झाली आहे.

पावसाची दडी

गुहागर : यावर्षी तालुक्यात सुरुवातीला चांगला पाऊस झाला. त्यामुळे बळीराजाने शेतीच्या कामाला उत्साहाने सुरुवात केली होती. पेरण्याही वेळेत झाल्या होत्या. पाऊस चांगला पडत असल्याने नांगरणीलाही सुरुवात केली होती. परंतु, जून महिन्याच्या अखेरच्या आठवड्यापासून पावसाचे प्रमाण कमी झाले आहे, त्यामुळे पुन्हा लावणीच्या कामाचा खोळंबा झाला आहे.