स्वच्छतेत दापोलीचे एक पाऊल पुढे

स्वच्छता अभियानाला बळकटी : स्वच्छ भारत अभियानाला उत्स्फूर्त प्रतिसाद; १२० सार्वजनिक शौचालये

शिवाजी गोरे- दापोली--देशभर स्वच्छ भारत अभियान राबविले जात असून, या अभियानामुळे सर्वत्र जनजागृती व्हायला लागली आहे. असे असले तरीही अनेक शहरांमध्ये दुर्गंधीचे साम्राज्य पसरले आहे. सार्वजनिक शौचालयांची दुरवस्था दिसून येत आहे. ‘लोकमत’ने रत्नागिरी जिल्ह्यातील नगरपालिकांतील शौचालय स्वच्छता यावर प्रकाश टाकण्याचा प्रयत्न केला आहे. अनेक शहरांमध्ये शौचालयांची दुरवस्था आढळून आली. मात्र, याला दापोली शहर अपवाद आहे. दापोली शहरातील शौचालये सुस्थितीत असल्याचे आढळून आले असून, स्वच्छतेबाबत दापोली नंबर वन असल्याचे ‘लोकमत’च्या सर्वेक्षणात आढळून आले आहे.
देशात भाजपचे सरकार सत्तेत आल्यावर जुन्या काँगे्रस सरकारच्या निर्मळ ग्रामयोजनेत बदल करून पंतप्रधान नरेंद्र मोदी यांनी ‘स्वच्छ भारत मिशन’ हाती घेतले आहे. सुरुवातीच्या काळात या मोहिमेला बरीच प्रसिद्धी देण्यात आली. याचे आता सकारात्मक पडसाद दिसू लागले असून, राज्यातील अनेक नगरपालिकांना २ आॅक्टोबर गांधी जयंती दिनी पुरस्कार देऊन सन्मानित करण्यात आले. केंद्र सरकार व महाराष्ट्र सरकारने स्वच्छता मोहीमेवर अधिक भर दिला आहे. उघड्यावरील शौचामुळे होणारे आजार व मानहानी यातून सुटका करण्यासाठी ‘घर तेथे शौचालय’ अशी योजनासुद्धा आखली आहे.
दापोली शहरात या योजनेला उत्तम प्रतिसाद मिळाला असून, दापोली नगरपंचायत शंभर टक्के हागणदारी मुक्त शहर बनले आहे. या शहरातील केवळ १२० कुटुंबांकडे घरगुती शौचालये नाहीत. ही कुटुंब सार्वजनिक शौचालयाचा वापर करतात. दापोली शहरात एकूण २४ सार्वजनिक शौचालये आहेत. स्त्री व पुरुष अशी शौचालये आहेत. दापोली शहराची गरज लक्षात घेऊन या शौचालयात ५०० लीटर पाण्याची टाकी ठेवण्यात आली असून, २४ तास पाणी उपलब्ध करुन देण्यात आले आहे.
३ लाख ५० हजार रुपये खर्च करून दापोली शहरातील सर्व शौचालयांचे नूतनीकरण करण्यात आले आहे. शौचालयांची रंगरंगोटी व परिसर स्वच्छ करण्यात आला आहे. सार्वजनिक शौचालयांमुळे परिसरातील नागरिकांना कोणताही त्रास होऊ नये, याची काळजी घेण्यात आली आहे. स्त्रियांची सार्वजनिक शौचालयेसुद्धा सुस्थितीत ठेवण्यात आली आहेत. त्यामुळे कोणताही अनुचित प्रकार होण्याची शक्यता नाही.
दापोली शहरात बाहेरगावाहून येणाऱ्या लोकांची संख्या अधिक असल्याने त्यांची होणारी गैरसोय लक्षात घेऊन शहराच्या मध्यभागी केळस्कर नाका येथे ३३ लाख रुपये खर्चून सुलभ शौचालय बांधण्यात येणार आहे. या सुलभ शौचालयाची वर्क आॅर्डर देण्यात आली आहे. या सुलभ शौचालयामुळे दापोली शहरात येणाऱ्या पर्यटक व तालुक्यातील ग्रामस्थांची गैरसोय दूर होणार आहे. दापोली शहरात एस. टी. आगारात पूर्वीचे एक शौचालय आहे तसेच दुसरे शौचालय झाल्यास लोकांची होणारी गैरसोय दूर होणार आहे.
दापोली नगरपंचायतीने प्लास्टिक मुक्तीनंतर सर्वच स्तरावर आघाडी घेतली असून, शहरातील जनतेच्या आरोग्याची काळजी म्हणून स्वच्छता मोहिमेवर अधिक भर देण्यात येत आहे. गटारे वेळीच साफ करून कचरा घंटागाडीतून गोळा करण्यात येत असल्याने रस्त्यावर पडणाऱ्या कचऱ्याचे प्रमाण घटले आहे.

आरोग्याची काळजी : शहर हागणदारी मुक्त
दापोली नगरपंचायतीने जनतेच्या आरोग्याची काळजी घेण्याचा पुरेपूर प्रयत्न केला असून, दापोली शहरातील जनतेला स्वच्छ पाणी, वीज, पायाभूत सुविधा पुरविल्या आहेत. दापोली शहर शंभर टक्के हागणदारी मुक्त शहर असून, शहरात केवळ १२० कुटुंब सार्वजनिक शौचालयाचा वापर करतात. त्यांना दापोली नगरपंचायतीमार्फत शौचालये बांधून देण्यात येणार आहेत.
- जावेद मणियार, नगराध्यक्ष.


तक्रारी नाहीत
दापोली शहरातील सार्वजनिक शौचालयांची स्थिती चांगली असून, शौचालयाबाबत नागरिकांच्या कोणत्याही तक्रारी नसल्याचे दिसत आहे.