मानसिक तणावातून सचिन देवरुखकरची आत्महत्या?

चिपळूण : शहरातील बेंदरकर आळी येथील सचिन देवरुखकर या तरुणाने शुक्रवारी गळफास घेत आत्महत्या केली. त्याच्या आत्महत्येचे गूढ कायम असले, तरी तो गेले काही दिवस तणावाखाली वागत होता. त्याच्या वागण्यात मोठा फरक पडला होता. त्यामुळे मानसिक तणावातून त्याने असे टोकाचे पाऊल उचलले असावे, अशी चर्चा परिसरात ऐकण्यास मिळत आहे.

चिपळूण तसेच मुंबई व पुणे येथे देवरुखकर ज्वेलर्स म्हणून प्रसिद्ध असलेले सुभाष देवरुखकर यांचा मुलगा सचिन देवरुखकर याने शुक्रवारी सायंकाळी घरात गळफास घेऊन आत्महत्या केल्याचे उघडकीस आले आणि बेंदरकर आळीसह वडनाका, वाणीअळी परिसरात एकच खळबळ उडाली. गेल्या महिनाभरात याच परिसरातील ही दुसरी आत्महत्या असल्याने साहजिकच परिसरात भीतीचे वातावरण निर्माण झाले. महिनाभरापूर्वी अभिजित गुरव या तरुणाने आत्महत्या केली होती. आर्थिक विवंचना आणि सावकारी कर्जाचा जाच त्यामुळे अभिजितने आत्महत्या केल्याचे समोर आले होते.

सचिन देवरुखकर या तरुणाच्या बाबतीत असे काहीच नसल्याने त्याच्या आत्महत्येचे गूढ वाढले आहे. प्रत्यक्षात देवरुखकर कुटुंब हे सधन कुटुंब आहे. ज्वेलर्स व्यवसायात त्यांचे मोठे नाव आहे. सचिन हा स्वतः चिपळूण येथील पेढी संभाळत होता. त्यामुळे आर्थिक विवंचना अथवा कर्ज वगैरे अशी कोणतीच तणावाची परिस्थिती नव्हती. वेळप्रसंगी तो मित्रांना आर्थिक मदत करणारा तरुण होता. त्यामुळे त्याची आत्महत्या आश्चर्याचे कारण बनली आहे.

गेले काही दिवस त्याच्या वागण्यात बोलण्यात कमालीचा फरक पडला होता. त्याला शोभिवंत मासे आणि फिश टँकची प्रचंड हौस होती. परंतु गेल्या काही दिवसात त्याने ते मासे आणि फिश टँक विकून टाकले होते, असेही त्याचे मित्र सांगतात. परंतु तो असे काही टोकाचे पाऊल उचलेल हे कोणाच्या ध्यानीमनीही नव्हते. तीनच दिवसांपूर्वी त्याच्या आजीचे निधन झाले होते. त्यामुळे संपूर्ण देवरुखकर कुटुंब दुःखात होते. सचिनच्या वाढदिवसाला गिफ्ट देण्यासाठी नवीन कार बुक करण्यात आली होती. परंतु आजीच्या निधनामुळे ती कार घरी आणली नव्हती, अशी माहितीही मिळत आहे. एका तरुणाबाबत झालेल्या या प्रकारामुळे हळहळ व्यक्त केली जात आहे.