प्लँट नं. ७ च्या नावाने भरते उरात धडकी

आवाशी : नवीन कामगार भरती, नवीन ठेकेदारी वा ठेकेदारीवरील नोकरभरती जर प्लँट नं. ७ ला असेल तर ‘प्लँट नं. ७ नको रे बाबा’ असाच सूर तोंडी आहे.

येथील घरडा केमिकल्स लि. या कंपनीचा रिसर्च ॲण्ड डेव्हलपमेंट भाग स्वतंत्र आहे. कंपनीच्या मुख्य जागेत एकूण सहा प्लँंट आहेत, तर सातवा प्लँट हा आर अ‍ँड डी विभागात आहे. जवळपास दहा वर्षांपासून हा सात नंबरचा प्लँट उत्पादन घेण्यासाठी कार्यान्वित केला गेला आहे. इन्डोस्कार्ब हे उत्पादन येथे घेतले जाते. मात्र या प्लँटचे असे वैशिष्ट्य आहे की, नवीन नोकरभरती, नवीन ठेकेदारी वा ठेकेदारीवरील नोकरभरती करावयाची असेल तर कंपनी व्यवस्थापनाकडून प्लँट नं. ७ ची शिफारस केली जाते. मात्र तेथे काम करून गेलेला माणूस वा ठेकेदार ‘मला ७ नंबर प्लँटमध्ये कामच नको,’ असे बाहेर सांगतात. याचाच अर्थ हा प्लँट घातक स्वरूपाचा आहे का? किंवा येथे घेतले जात असणारे उत्पादन वा उत्पादनासाठी वापरण्यात येणारा कच्चा माल याचे मानवी शरीरावर काही विपरीत परिणाम होतात का? असे प्रश्न उपस्थित होत आहेत.

या प्लँटबद्दल अनेकांचे नकारात्मक उत्तर आहे आणि याच प्लँटमध्ये शनिवारी झालेल्या दुर्घटनेनंतर अनेक प्रश्न निर्माण झाले आहेत.

उच्च व तंत्रशिक्षण मंत्री उदय सामंत यांनी प्रत्येक कंपनीचे स्ट्रक्चरल ऑडिट व सेफ्टी ऑडिट करण्याचे आदेश दिले आहेत. त्याचप्रमाणे घरडा केमिकल्सच्या या प्लँट नं. ७ बद्दल अनेकांच्या मनात असणाऱ्या अनुरुत्तरित प्रश्नांची उकल करण्याचेही आदेश द्यावेत अशी मागणी होत आहे. येथे काम करून गेलेल्या अनेकांशी याबाबत विचारणा केली असता सदर प्लँटमध्ये खूप त्रास होतो असे सांगितले जात आहे. कंपनीकडून पुरवण्यात येणाऱ्या सुरक्षा साधनांबाबत संबंधितांचे काहीही विरोधी मत नाही; मात्र तिथे खूप त्रास होतो एवढेच सांगितले जात आहे. त्यामुळे सुरक्षा साधने वापरून कदाचित तेथील रसायनांचा मानवी जीवनावर विपरीत परिणाम होत असेल तर असले उत्पादन कंपनीने प्रामाणिकपणे बंद करावे. तेथे अन्य उत्पादनांचा विचार करावा, असाही सल्ला अनेकजण देत आहेत.