नेत्रावती एक्स्प्रेस, मस्त्यगंधा एक्स्प्रेस थांब्यासाठी आंदोलन छेडणार : संदेश जिमन

लाेकमत न्यूज नेटवर्क

देवरुख : काेकण रेल्वे मार्गावरील नेत्रावती आणि मत्स्यगंधा एक्स्प्रेसला संगमेश्वर रेल्वे स्थानकात थांबा देण्याची मागणी करण्यात आली आहे. हा थांबा मिळण्यासाठी रेल्वे प्रशासनाला जागे करण्यासाठी १५ ऑगस्ट राेजी संगमेश्वर येथे उपाेषण करण्यात येणार असल्याची माहिती निसर्गरम्य चिपळूण आणि निसर्गरम्य संगमेश्वर फेसबुकचे प्रमुख संदेश जिमन यांनी दिली. या आंदाेलनात संगमेश्वर भागातील १९६ गावांमधील ग्रामस्थ सहभागी हाेणार आहेत. याबाबतचे निवेदन काेकण रेल्वे प्रशासनाला देण्यात आले आहे.

संदेश जिमन यांनी सांगितले की, आतापर्यंत अनेकदा पत्रव्यवहार आणि पाठपुरावा करूनदेखील आमच्या मागणीकडे प्रशासनाने दुर्लक्षच केले आहे. त्यामुळे संगमेश्वरातील कोकण रेल्वेचे प्रवासी संतप्त झाले आहेत. त्यात १९६ गावांमधील हजारो स्त्री-पुरुष, आबालवृद्ध, संघटना, संस्था, मंडळे, शेतकरी, कामगार, बेरोजगार तरुण अशा कित्येकांचा समावेश आहे. स्थानिक नेते, पुढारी, राजकीय आणि सामाजिक घटकांचाही या मागणीला पाठिंबा आहे. आता या सगळ्यांनी एकत्र येऊन संगमेश्वर रेल्वे स्थानकात नेत्रावती आणि मत्स्यगंधा एक्स्प्रेस या दोन गाड्यांना थांबा मिळावा म्हणून एल्गार केला आहे. आम्ही मोजके कार्यकर्ते कोविड-१९चे सर्व नियम पाळून सनदशीर मार्गाने हे उपोषण करणार असल्याचे त्यांनी सांगितले.

याविषयीचे निवेदन ग्रुपचे प्रमुख संदेश जिमन यांच्यासह नरेंद्र नितेश मालप, शांताराम टोपरे, संजय म्हापुस्कर, प्रसाद नागवेकर, तेजस सुर्वे, अनंत माईन यांनी दिले. या आंदाेलनासाठी संतोष कांबळे, दीपक पवार, गणपत दाभोलकर, जगदीश कदम, मुकुंद सनगरे, वसंत घडशी, चंद्रकांत भेकरे यांचे सहकार्य लाभले आहे.

------------------------------

संगमेश्वर येथे नेत्रावती, मत्स्यगंधा एक्स्प्रेस या गाड्यांना थांबा मिळण्यासाठी निसर्गरम्य चिपळूण आणि निसर्गरम्य संगमेश्वर फेसबुक ग्रुपतर्फे रेल्वे प्रशासनाला निवेदन देण्यात आले.