गुहागरात काेराेनाचा कहर

गुहागर : तालुक्यात गेल्या आठ दिवसांत २०० हून अधिक रुग्णांची भर पडल्याने सद्य:स्थितीत ४८१ हून अधिक रुग्ण कोरोनाग्रस्त झाले आहेत. यामध्ये १२ गावांमध्ये १० पेक्षा अधिक रुग्ण आहेत. तर, गुहागर शहरात सर्वाधिक ६३ रुग्ण आहेत.

तालुक्यात १२ गावांमध्ये १० पेक्षा अधिक कोरोनाग्रस्त रुग्ण आहेत. यामध्ये पालपेणे १०, चिखली १०, त्रिशूळ साखरी ११, चिंद्रावळे १२, पवारसाखरी व आरेगारव प्रत्येकी १३, शृंगारतळी १४, गोणवली १५, आबलोली २३, वेळंब ४४ तर गुहागर शहरात सर्वाधिक ६३ रुग्ण आहेत. तसेच सुरळ, भातगाव, असगोली, पालकोट, मढाळ, शिवणे, विसापूर, पांगारी, गिमवी, देवघर, वाडदई, वाघांबे, वेलदूर, घरटवाडी, पोमेंडी, झोंबडी, कोळवली या गावात प्रत्येकी एक कोरोनाग्रस्त आहेत. तर कौंढर काळसूर, अडूर, वेलदूर, पाभरे, परचुरी, मळण या गावात प्रत्येकी २ कोरोनाग्रस्त आहेत. ३ रुग्ण असलेल्या गावांमध्ये पिंपर, आरजीपीपीएल कंपनी, खामशेत मोडकाआगर, हेदवी या गावांचा समावेश आहे. वरवेली व पाटपन्हाळे गावात प्रत्येकी ४ रुग्ण आहेत. पिंपळवट व तवसाळ येथे ५, रानवीमध्ये ६, खोडदेत ७, तळवली व पालशेत ८ व निगुंडळमध्ये ९ रुग्ण आहेत.

गृह अलगीकरणाचे नियम न पाळणारे रुग्ण आणि सर्दी, ताप, खोकला लपवून ठेवणारे यांच्याकडून कोरोना वेगाने वाढत असल्याचा निष्कर्ष आरोग्य अधिकाऱ्यांकडून व्यक्त केला जात आहे.